SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Dóretiwshiler menen jaslar arasında turmıslıq pikir almasıw

2025-jıl 26-fevral kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı ádebiy ilajǵa basshılıq etti. Ilajda Ózbekstan hám Qaraqalpaqstan mádeniyatına óz úlesin qosqan, sonıń menen birge, jaslardı ilhamlandırǵan belgili dóretiwshiler - Ózbekstan Respublikasına xızmet kórsetken jurnalist, Qaraqalpaqstanǵa miyneti sińgen mádeniyat xızmetkeri, shayır, A.Oteniyazova, Qaraqalpaqstan xalıq jazıwshısı, filologiya ilimleriniń kandidatı A.Abdiyev, Qaraqalpaqstanǵa miyneti sińgen jurnalist, Ózbekstan hám Qaraqalpaqstan jazıwshılar awqamınıń aǵzası, balalar shayırı Y.Ajimov qatnastı.

Ushırasıwdı filialdıń oqıw isleri boyınsha direktor orınbasarı Q.Atanazarov ashıp berdi. Ol óziniń sózinde, bunday ilajlardıń jaslardı dóretiwshilik jumıslar menen jaqınnan tanıstırıw, olardıń arasında mádeniyat hám ádebiyatqa bolǵan qızıǵıwshılıqtı arttırıwdaǵı áhmiyetine ayrıqsha itibar qaratıp, jaslardı ruwxıy jaqtan jetilistiriw hám olardı dóretiwshilik jumıslar menen tanıstırıwdıń áhmiyetli ekenligin aytıp ótti.

Bul ushırasıwda dóretiwshiler óz iskerligi hám turmıslıq tájiriybeleri menen ortaqlastı. Ilajdıń tiykarǵı bóliminde dóretiwshilerdiń qutlı 60 hám 70 jıllıq yubileyleri de ayrıqsha atap ótildi. Bul yubileyler - óziniń uzaq jıllıq dóretiwshilik jumısı menen tanılǵan dóretiwshiler A.Oteniyazova hám Y.Ajimovlardıń ómir jolları hám dóretiwshilik miynetlerin tán alıw imkaniyatına aylandı. Dóretiwshilerdiń ótken ómir jolları, erisken jetiskenlikleri hám olardıń ádebiyatqa qosqan úlesi ayrıqsha atap ótildi.

Olardıń miyneti, ásirese, jas áwlad ushın áhmiyetli úlgi bolıp esaplanadı. Bunnan tısqarı, ilaj dawamında dóretiwshiler óz tájiriybelerin jaslar menen bólisti. A.Oteniyazova óziniń jurnalistlik jumısınan úyrenilgen sabaqlardı, sonday-aq, jurnalistlik hám shayırlıqtıń quramalı táreplerin jarıtıp berdi. Y.Ajimov bolsa balalar ádebiyatı hám jaslardı kitap oqıwǵa tartıwda dóretiwshiliktiń ornı haqqında aytıp berdi. Olar jaslardıń turmıslıq tájiriybelerine itibar qaratıp, óz dóretiwshilik jollarında qanday jetiskenliklerge erisiw múmkin ekenligin túsindirdi.

Ilajda jaslar tárepinen dóretiwshilerge kóplegen sorawlar berildi, olar óziniń dóretiwshilik jolı, tájiriybesi hám másláhátleri menen ortaqlastı. Dóretiwshiler ózleriniń jaslar ushın qanday kórsetpeler beriwin, qaysı jollar menen tabısqa erisiwin túsindirip, olarǵa ilham berdi. Bul ushırasıw óziniń ruwxıy hám ilimiy tárepleri menen jaslar ushın úlken áhmiyetke iye boldı.
Ilaj juwmaǵında, dóretiwshiler hám jaslar arasında qızǵın sáwbetler ótkerildi, bul bolsa jaslardıń dóretiwshilik ósiwi hám rawajlanıwına unamlı tásir kórsetti. Usınday ádebiy ilajlar student-jaslardıń pikirin qáliplestiriw hám ruwxıy rawajlanıwına xızmet etedi.