SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qaraqalpaq ádebiyatında qosıqları mórlengen Ziywar

Qaraqalpaq ádebiyatı tariyxında óshpes iz qaldırǵan, óz dáwirinde ádebiyatımızda jańa betti jarata alǵan, milletiń ardaqlı perzenti bolıwday ullı baxıtqa miyassar bolǵan, gózzal dóretpelerdiń avtorı Ájiniyaz Qosıbay ulı tárepinen jazılǵan qatarlar hár birimizdiń qálbimizge mórlengen.

Usı jılı shayırdıń tuwılǵanına 200 jıl tolıwı múnásibeti menen xalıqaralıq hám respublikalıq kólemdegi ilájlar joqarı dárejede ótkeriliwi belgilenbekte. Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında usı múnásibet pepen "Watan hám muhabbat jırshısı" temasında ádebiy keshe shólkemlestirildi. Onda Qaraqalpaqstan xalıq jazıwshısı, filologiya ilimleriniń kandidatı A.Abdiev, Ózbekstan hám Qaraqalpaqstan Jazıwshılar awqamınıń aǵzası, shayır A.Qayıpov, filial basshılları, xızmetkerler hám studentler qatnastı. Ilájda sózge shıqqanlar, Ájiniyaz Qosıbay ulınıń XIX ásir qaraqalpaq ádebiyatına qosqan salmaqlı úlesi, shayır tárepinen dóretilgen ájayip qosıqlardıń tereń mazmunı búgingi kúnde jaslardıń ruwxıy dúnyasın jáne de bayıtıwǵa hám watandı súyiwdi úyretiwge xızmet qılıp atrıǵanlıǵı haqqında toqtalıp ótti.

Ájiniyaz babamız tek ǵana qaraqalpaq ádebiyatında emes, bálkim qazaq ádebiyatında aytıs janrı boyınsha óziniń «mór»in qaldırǵan. Shayır ómiri dawamında ilim alıwǵa, zıyalı insan bolıwǵa umtılǵan. Óziniń dóretken shıraylı qatarları menen xalıqtıń kewilinen orın alǵan. Jas áwladlar bul dóretiwshi insandı shın mánisinde ózlerine úlgi dep sanaydı. Úlken maqtanıshımız, qaraqalpaq ádebiyatında óziniń úlken izlerin hám altınǵa teń násiyatların qaldırǵan Ájiniyaz shayırdıń esteligi mudamı qálbimizge mórlenedi. Ádebiy keshe dawamında student-jaslar tárepinen shayırdıń qosıqları atqarıldı. Ásirese qábiletli student Sh.Qarlıbaeva tárepinen duwtar menen aytılǵan janlı qosıqlar hámmege birdey zawıq baǵıshladı.