SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Veterinariya tarmaǵınıń ilimiy rawajlanıwı dodalaw orayında

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında "Veterinariya medicinasınıń zamanagóy ilim jetiskenlikleri hám sharwashılıqtı rawajlandırıw perspektivaları" atamasında Respublikalıq ilimiy-ámeliy konferenciya ótkerildi. Ilaj "Veterinariya medicinası hám farmakologiyası" kafedrası baslaması menen shólkemlestirildi. Bul ilimiy ánjumanda Ózbekstan Respublikası Veterinariya hám sharwashılıqtı rawajlandırıw mámleketlik komitetiniń wákilleri, elimizdegi jetekshi joqarı bilimlendiriw mákemeleri hám ilimiy-izertlew institutlarınıń professor-oqıtıwshıları, ilimiy xızmetkerleri, magistrantları hám studentleri qatnastı.

Shólkemlestiriwshilerdiń baslaması menen alıp barılǵan xalıqaralıq ilimiy baylanıslar nátiyjesinde, konferenciyaǵa qońsı mámleketlerden bayanatshılar aralıqtan turıp qatnastı. Bul bolsa regionallıq ilimiy birge islesiwdi bekkemlew baǵdarındaǵı unamlı ilgerilewlerdi kórsetedi. Konferenciyanıń basında filial direktorı A.Esimbetov shıǵıp sóylep, ilaj qatnasıwshıların qutlıqladı hám onıń ilimiy hám ámeliy áhmiyetine toqtap ótti. Ilaj dawamında zamanagóy veterinariya iliminiń áhmiyetli mashqalaları, ilimiy-innovaciyalıq jetiskenliklerdi ámeliyatqa engiziw baǵdarları, farmakologiyalıq qadaǵalaw hám sharwashılıq salamatlıǵın saqlawda aldıńǵı usıllar dodalandı.

Bayanatlar hám dodalawlar tiykarında alǵa qoyılǵan ilimiy kózqaraslar analitikalıq hám teoriyalıq jaqtan tiykarlanǵan bolıp, olar tarawǵa baylanıslı bar mashqalalardı ilimiy sheshiw jolların ashıp berdi. Konferenciyada "Buzawlarda zat almasıw processlerine dárilik zatlardıń tásiri hám nadurıs qollanılıwı" atamasında bayanat jasaǵan veterinariya ilimleri boyınsha filosofiya doktorı (PhD) J.Rejepbaev óziniń ilimiy nátiyjeleri menen qatnasıwshılarda úlken qızıǵıwshılıq oyattı. Izertlew nátiyjelerine bola, buzawlarda metabolik proceslerdiń turaqlılıǵı sharwa mallarınıń salamatlıǵın támiyinlewshi tiykarǵı faktorlardan biri bolıp, dári-dármaqlardıń nadurıs yamasa normadan artıq qollanılıwı organizmde intoksikaciya, bawırda distrofik ózgerisler hám immun sistemasınıń tómenlewine alıp keletuǵını anıqlanǵan.

Bunday jaǵdaylardıń aldın alıw ushın hár bir jaǵdayda differencial diagnostikaǵa tiykarlanǵan individual qatnas zárúrligi ilimiy tiykarda dálillengen. J.Rejepbaev, sonday-aq, farmacevtikalıq qadaǵalaw sistemasın jetilistiriw, dári qurallarınıń sapasın tallaw, olardı islep shıǵarıw hám qollanıwda ekologiyalıq qáwipsizlik talaplarına ámel etiw áhmiyetli ekenligin atap ótti. Izertlewlerde metabolik sindromlardıń patogenezi, buzawlarda ósiw kórsetkishlerine farmakologiyalıq faktorlardıń tásiri sıyaqlı máseleler keń úyrenilgen. Konferenciya dawamında alǵa qoyılǵan ilimiy pikirler, tájiriybe nátiyjeleri hám analitikalıq pikirler, tiyisli ilimiy baǵdarlarda izbe-iz izleniwler alıp barıw ushın zárúr ilimiy-metodikalıq tiykar bolıp xızmet etedi. Bul ilimiy-ámeliy konferenciya veterinariya medicinası tarawında júzege kelip atırǵan áhmiyetli mashqalalardı tereń tallaw, innovaciyalıq qatnasıqlar tiykarında ámeliy sheshimler islep shıǵıw, sonday-aq, ilimiy izleniwler hám tájiriybe almasıwdı sistemalı tiykarda rawajlandırıw jolında áhmiyetli konceptuallıq basqısh bolıp xızmet etti.