Prezident hám ataqlı mámleketlik stipendiyalar jeńimpazlarına gúwalıqlar tapsırıldı

---

     Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında Jaslar kúni múnásibeti menen filial direktorı hám student-jaslardıń qatnasıwında ashıq sáwbet shólkemlestirildi. Ushırasıw qızǵın, ashıq hám erkin ruwxta ótip, onda studentlerdiń pikir-usınısları tıńlandı, olardı qıynap atırǵan máseleler boyınsha usınıs hám baslamalar dodalandı.
    Ilaj aldınan filial direktorı, professor A.Esimbetov student-jaslar menen ashıqtan-ashıq sáwbetlesip, olardıń bilimlendiriw procesindegi belsendiligi, ilimiy izlenisleri hám keleshektegi rejeleri menen qızıqsındı.
    Sáwbetlesiw dawamında jaslardı qollap-quwatlaw, olardıń baslama hám ideyaların xoshametlew, ilim hám innovaciyalar jolında isenimli qádem taslap atırǵan studentler ushın zárúr sharayatlar jaratıp beriw búgingi kúnniń áhmiyetli wazıypalarınan biri ekeni atap ótildi.
    Ushırasıw dawamında filial studentleri erisip atırǵan jetiskenlikler ayrıqsha atap ótildi. Aldın xabar bergenimizdey, 2025-2026-oqıw jılında filialımızdıń 4 qábiletli studentleri Prezident hám ataqlı mámleketlik stipendiyalarǵa iye bolıwǵa erisken edi. Usı múnásibet penen Joqarı bilimlendiriw, ilim hám innovaciyalar ministri Q.Sharipov tárepinen jiberilgen gúwalıqlardı saltanatlı tapsırıw máresimi de shólkemlestirildi. Jeńimpazlar jáne bir márte qutlıqlanıp, olardıń umtılısı hám miyneti basqa student-jaslar ushın úlgi ekeni ayrıqsha atap ótildi.
    Sıylıqlaw procesinde jáne bir itibarǵa ılayıq tabıs ta atap ótildi. Jaqında "Sanlı áwlad qızları" tańlawınıń final basqıshında jeńimpazlıqtı qolǵa kirgizip, Qıtay mámleketine bilimlendiriw saparına jollamanı qolǵa kirgizgen 1-kurs magistrantı Sh.Qarlıbaeva da ilaj dawamında ayrıqsha atap ótildi. Oǵan sertifikat tapsırılıp, ilimiy hám jámiyetlik belsendiligi joqarı bahalandı.
    Ushırasıw juwmaǵında studentlerge bilim alıwǵa bolǵan umtılıstı jáne de kúsheytiw, hár qıylı tańlaw hám joybarlarda belsene qatnasıw, filialdıń abırayın joqarılatatuǵın jańa jetiskenliklerge umtılıw zárúrligi atap ótildi.
    Atap ótilgenindey, jaslardıń hár bir tabısı tek ǵana olardıń jeke jeńisi emes, al filial abırayı hám bilimlendiriw dárgayınıń abırayın jáne de joqarılatıwshı faktor sıpatında atap ótildi.скачать dle 12.1