Márt jigitler maydanda bellesti

"Márt jigitler — Watan tayanıshı" sport jarısları ótkerildi

14-yanvar — "Watan qorǵawshıları kúni" bayramı múnásibeti menen Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında student-jaslar arasında "Márt jigitler — Watan tayanıshı" atamasında sport jarısları shólkemlestirildi.

Jarıstıń saltanatlı ashılıw máresiminde Jaslar máseleleri hám ruwxıy-aǵartıwshılıq isleri boyınsha birinshi direktor orınbasarı X.Abdijaliyev shıǵıp sóylep, barlıq qatnasıwshılardı bayram menen qutlıqladı hám komandalarǵa áwmet hám tabıslar tiledi. 

Jarıs dawamında student-jaslar tas kóteriw, arqan tartıw hám turnikke tartılıw sıyaqlı sport túrleri boyınsha óz-ara kúsh sınastı. Jarıslar qızǵın, qızıqlı hám joqarı sport ruwxında ótti. Bayram aldınan ótkerilgen bul ilaj student-jaslarǵa kóterińki keypiyat hám umıtılmas tásirler baǵıshladı.

Juwmaqlawshı nátiyjelerge bola, 1-orındı 101-topar komandası, 2-orındı sırtqı tálim baǵdarındaǵı 502-topar komandası, 3-orındı bolsa 111-topar komandası iyeledi. Jeńimpaz hám sıylı orın iyeleri bahalı sawǵalar hám diplomlar menen sıylıqlandı.

Bul sport jarısları jaslar arasında salamat turmıs tárizin úgit-násiyatlaw, fizikalıq shınıǵıw hám watansúyiwshilik ruwxın bekkemlewde úlken áhmiyetke iye boldı.