Ashıq-aydınlıq — bilimlendiriw sistemasınıń tiykarǵı principi

---

    Búgingi kúnde mámleketimizde mámleketlik basqarıw hám jámiyetlik turmıstıń barlıq tarawlarında ashıq-aydınlıq principlerin támiyinlew tiykarǵı wazıypalardan birine aylanbaqta. Ásirese, jaslar bilim alatuǵın joqarı bilimlendiriw mákemelerinde hadallıq ortalıǵın bekkemlew, korrupciyalıq jaǵdaylardıń aldın alıw hám jámiyetlik qadaǵalawdı kúsheytiw úlken áhmiyetke iye bolmaqta.
   Usı maqsette ǵalaba xabar qurallarınıń wákilleri, blogerler hám jámiyetlik belsendilerdiń qatnasıwında hár qıylı ashıq sóylesiwler hám ushırasıwlar shólkemlestirilip, bilimlendiriw processlerindegi ashıq-aydınlıqtı támiyinlewge ayrıqsha itibar qaratılmaqta.
   Usınday ilajlardan biri Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında shólkemlestirildi. "Oqıw processlerinde korrupciyanıń aldın alıw hám oǵan qarsı gúresiw boyınsha ámelge asırılıp atırǵan jumıslar" atamasında ótkerilgen ashıq sáwbetlesiwde ǵalaba xabar qurallarınıń wákilleri, jámiyetlik belsendiler hám filial jámááti qatnastı. Ilajdı filialdıń Jaslar máseleleri hám ruwxıy-aǵartıwshılıq isleri boyınsha direktordıń birinshi orınbasarı X.Abdijaliyev ashıp berdi.
   Ol óz sózinde mámleketimizde korrupciyaǵa qarsı gúresiw máselesi mámleketlik siyasat dárejesine kóterilgenin, bul baǵdarda ásirese bilimlendiriw sistemasında ádillik, hadallıq hám ashıq-aydınlıq principlerin bekkemlew áhmiyetli wazıypalardan biri ekenin atap ótti.
  Sonday-aq, bilimlendiriw mákemelerinde studentlerdiń bilim hám potencialın qalıs bahalaw, olar ushın teń hám ádil sharayat jaratıw, oqıw processleriniń ashıq-aydınlıǵın támiyinlew eń áhmiyetli wazıypalardan biri sıpatında qaralıp atırǵanı atap ótildi.
  Ilaj dawamında filialda korrupciyaǵa qarsı gúresiw baǵdarında ámelge asırılıp atırǵan jumıslar boyınsha Korrupciyaǵa qarsı gúresiw "Komplaens-qadaǵalaw" sistemasın basqarıw bóliminiń bas qánigesi I.Dawletmuratov tárepinen tolıq maǵlıwmat berildi.
  Onıń atap ótiwinshe, filialda oqıw processlerin ashıq-aydın shólkemlestiriw, bahalaw sistemasında ádillik principlerine qatań ámel etiw, studentlerdiń múrájatların sistemalı úyreniw hám hár qanday korrupciyalıq jaǵdaylardıń aldın alıwǵa qaratılǵan kompleksli ilajlar ámelge asırılmaqta.
  Sonıń ishinde, studentler menen turaqlı ashıq pikirlesiwler shólkemlestiriw, múrájat hám usınıslardı úyreniw, oqıw processlerin turaqlı qadaǵalaw, ádalatsızlıq jaǵdaylarına mawasasız múnásibetti qáliplestiriwge ayrıqsha itibar qaratılıp atırǵanı atap ótildi.
  Bunday ilajlar bilimlendiriw mákemesinde salamat, ádil hám isenimli bilimlendiriw ortalıǵın qáliplestiriwge xızmet etpekte.
Ashıqtan-ashıq sáwbetlesiw dawamında jurnalistler tárepinen berilgen sorawlarǵa filial juwapkerleri tárepinen hár tárepleme juwaplar berildi.
  Ásirese, bilimlendiriw processlerinde ashıq-aydınlıqtı támiyinlew, studentlerdiń huqıqları menen máplerin qorǵaw jáne korrupciyalıq jaǵdaylarǵa qatań ilajlar kóriw máseleleri boyınsha pikir alısıldı.
  Qánigelerdiń atap ótiwinshe, bunday ashıq pikirlesiwler bilimlendiriw mákemeleriniń jumısınıń ashıq-aydınlıǵın támiyinlew, jámiyetlik qadaǵalawdı kúsheytiw hám joqarı bilimlendiriw sistemasında ámelge asırılıp atırǵan reformalar haqqında keń jámiyetshilikti xabardar etiwde úlken áhmiyetke iye.
Ushırasıw ashıq, qızǵın hám konstruktivlik ruwxta ótip, qatnasıwshılarda úlken tásir qaldırdı.скачать dle 12.1