🎁Jańa jıl múnásibeti menen

---

🎄Áyni kúnlerde respublikamız boylap jańa jıl keypiyatı gezip júr. Bayram keypiyatı, quwanısh hám iygilikli tilekler hár bir orında sezilmekte. Usınday kóterińki ruwxtaǵı ilajlar Samarqand mámleketlik veterinariya medicinası, sharwashılıq hám biotexnologiyalar universitetiniń Nókis filialında da ótkerildi.
🕯Búgin filialda jańa jıl múnásibeti menen shólkemlestirilgen bayram keshesi jámáát turmısındaǵı jarqın hám umıtılmas waqıyalardan birine aylandı. Ilaj professor-oqıtıwshılar hám xızmetkerlerdiń qatnasıwında qızǵın, bayram keypiyatında ótti.
😱Bayram keshesin filial direktorı, professor A.Esimbetov ashıp berdi. Ol óziniń qutlıqlaw sózinde 2025-jıl filial ushın nátiyjeli, bereketli hám áhmiyetli jetiskenliklerge bay bolǵanın ayrıqsha atap ótti.
🏡Bilimlendiriwdiń sapasın arttırıw, ilimiy potencialdı bekkemlew, xalıqaralıq birge islesiwdi rawajlandırıw hám student-jaslardıń belsendiligin qollap-quwatlaw baǵdarlarında erisilgen nátiyjeler jámááttiń pidákerlik miynetiniń nátiyjesi ekenin atap ótti.
🌲Filial direktorı, sonday-aq, kirip kiyatırǵan 2026-jıl menen barlıq ustazlar, xızmetkerler hám student-jaslardı qızǵın qutlıqlap, jańa jıl tınıshlıq, bereket, densawlıq hám jańa tabıslar alıp keliwin tiledi.
Bayram baǵdarlaması dawamında estrada kórkem óneri wákilleri tárepinen atqarılǵan shoq hám jańǵırǵan qosıqlar ilajǵa ayrıqsha payız baǵıshladı.
🛷Qızıqlı saxnalıq shıǵıwlar, kewilli muzıkalı kórinisler hám oyınlar jıynalǵanlarǵa unamlı keypiyat baǵıshladı. Zaldaǵı quwanıshlı ortalıq, qızǵın kúlkiler hám qol shappatlawlar bayram keypiyatın jáne de arttırdı.
👼Saltanatlı keshe juwmaǵında professor-oqıtıwshılar hám xızmetkerlerge jańa jıl sawǵaları tapsırıldı. Sonday-aq, bayram dawamında úsh nominaciya boyınsha jıldıń eń jaqsı oqıtıwshıları sıylıqlanıp, olarǵa diplom hám vaucherler tapsırıldı, bul bolsa ustazlardıń miynetin jáne de qádirlew hám xoshametlewge xızmet etti.
👋Bul bayram keshesi filialda salamat ruwxıy ortalıq, awızbirshilik hám óz-ara húrmet barǵan sayın bekkemlenip atırǵanın jáne bir márte kórsetti. Filial jámááti jańa 2026-jıldı úlken isenim, iygilikli niyetler hám úlken rejeler menen kútip alıwdı niyet etti.скачать dle 12.1