Xalqaro veterinariya kuni munosabati bilan samimiy tabrik!
Hurmatli professor-o‘qituvchilar, aziz talabalar, sohaning fidoyi mutaxassislari va qadrli hamkasblar!
Sizlarni insoniyat salomatligi, oziq-ovqat xavfsizligi va ekologik barqarorlikni ta’minlashda beqiyos o‘rin tutadigan sharafli kasb egalari sifatida Xalqaro veterinariya kuni munosabati bilan chin qalbimdan samimiy tabriklayman!
Bugungi kunda veterinariya nafaqat hayvonlar salomatligini muhofaza qilish, balki jamoat salomatligini ta’minlash, zoonoz kasalliklarning oldini olish, oziq-ovqat mahsulotlarining xavfsizligini nazorat qilish kabi o‘ta muhim vazifalarni ham o‘z ichiga olgan strategik sohalardan biri hisoblanadi. “Bir salomatlik” (One Health) konsepsiyasi doirasida veterinariya, tibbiyot va ekologiya o‘rtasidagi o‘zaro bog‘liqlik yanada yaqqol namoyon bo‘lib, sizlarning mas’uliyatli mehnatingiz ahamiyatini yanada oshirmoqda.
So‘nggi yillarda mamlakatimizda veterinariya va chorvachilik sohasini rivojlantirish, ilmiy-tadqiqot ishlarini qo‘llab-quvvatlash, zamonaviy laboratoriyalar va diagnostik markazlar faoliyatini kengaytirish, yuqori malakali kadrlar tayyorlashga alohida e’tibor qaratilmoqda. Bu borada oliy ta’lim muassasalarida amalga oshirilayotgan islohotlar, innovatsion ta’lim dasturlari va xalqaro hamkorlik loyihalari o‘z samarasini bermoqda.
Aziz ustozlar! Sizlar o‘zingizning boy tajribangiz va ilmiy salohiyatingiz orqali yosh avlodga chuqur bilim va yuksak kasbiy mahoratni singdirib, soha rivojiga mustahkam zamin yaratmoqdasiz.
Qadrli talabalar! Sizlar — ertangi kunning yetuk mutaxassislari sifatida yurt taraqqiyotida muhim o‘rin tutadigan kadrlarsiz. Bugun olayotgan bilim va ko‘nikmalaringiz kelgusida mamlakatimiz oziq-ovqat xavfsizligi va aholi salomatligini ta’minlashda asos bo‘lib xizmat qiladi.
Hurmatli hamkasblar! Sizlarning har kunlik zahmatli mehnatingiz, jonbozligingiz va kasbga bo‘lgan sadoqatingiz tufayli sohada ulkan yutuqlarga erishilmoqda. Xususan, epizootik barqarorlikni ta’minlash, yuqumli kasalliklarni bartaraf etish, seleksiya va naslchilik ishlarini takomillashtirish, veterinariya xizmatlari sifatini oshirish yo‘lidagi sa’y-harakatlaringiz yuksak e’tirofga loyiqdir.
Shu qutlug‘ ayyomda barchangizga mustahkam sog‘liq, oilaviy baxt-saodat, ilmiy va amaliy faoliyatingizda yangi yutuqlar, innovatsion g‘oyalar va ulkan muvaffaqiyatlar tilayman. Veterinariya sohasining nufuzi yanada yuksalib, mamlakatimiz taraqqiyotiga xizmat qilaversin!
Yana bir bor barchangizni Xalqaro veterinariya kuni bilan muborakbod etaman!
Hurmat bilan, filial direktori,
Biologiya fanlari doktori, professor,
Esimbetov Adilbay Tlepovich
скачать dle 12.1
Telefon
E-mail
