SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Китобхон талабалар иштирокида “Заковат” интеллектуал ўйинининг 3 тури ўтказилди

Талаба-ёшлар орасида китобхонликни кенг тарғиб қилиш мақсадида Ахборот хизмати раҳбари З.Хожамуратова ҳамда Ахборот-ресурс маркази бўлими бошлиғи Ж.Халмуратовалар ташаббуси билан ташкил этиб келинаётган «Бирга мутолаа қиламиз» шиори остидаги “Заковат” интеллектуал ўйини аллақачон кўпчиликнинг меҳрини қозониб улгурди.
Ўйиннинг 2 тури жуда ажойиб атмосферада ўтказилган эди. Куни кеча 3-тур ҳам бўлиб ўтди. Тадбирни Ёшлар масалалари бўйича ва маънавий-маърифий ишлар бўйича директорнинг биринчи ўринбосари С.Ганиев кириш сўзи билан очиб бериб, ушбу ташаббусни илгари суриб, китобхон талабаларни бир жойга жамлаган З.Хожамуратова ҳамда Ж.Халмуратоваларга алоҳида миннатдорчилик билдириб ўтди ва барча жамоага омад ва зафарлар тилади. Ж.Халмуратова ҳам сўзга чиқиб, иштирокчиларга финалга юқори балл билан етиб олишларини тавсия қилиб ўтди.

“Заковат” интеллектуал ўйинини ҳар доимгидек З.Хожамуратова қизиқарли тарзда олиб борди. Унинг раҳбарлигидаги «Қарекеӊше онлайн» жамоасининг йигит қизлари ўйин давомида барчага қувноқ кайфият улашишди. Жонли мусиқа билан бошланган тадбир жуда позитив кайфиятда давом этди. К.Султанов муаллифлигидаги «Ажинияз» романи асосида тузилган мантиқий саволлар иштирокчиларга бироз мураккаб туюлган бўлсада, улар ўз билимлари билан жавобларни топишга ҳаракат қилишди. Ўйин давомида 1-декабрь Қорақалпоқ тилига давлат тили мақоми берилганлигига 33 йил тўлиши муносабати билан она тили ҳақида бадиий шеърни маромига етказиб айтиб берган 3 та иштирокчига энг яхши совға китоб совға қилинди. Шунингдек, “Заковат” интеллектуал ўйини якунида ҳар бир жамоадан саволларга энг кўп жавоб қайтарган иштирокчилар танлаб олиниб, мотивация тариқасида уларга совғалар топширилди. «Бирга мутолаа қиламиз» шиори остидаги “Заковат” интеллектуал ўйинининг 3 тури мана шундай позитив атмосферада бўлиб ўтди.