Xitoyda erishilgan kelishuvlar ta’lim sohasidagi aloqalarni kengaytirmoqda
04 авг 2026
SAMARQAND DAVLAT VETERINARIYA
MEDITSINASI, CHORVACHILIK VA
BIOTEXNOLOGIYALAR UNIVERSITETI
NUKUS FILIALI
-
Telefon
+998 61 224 71 09
-
E-mail
samvminf@edu.uz
Prezident qararınıń orınlanıwı: Filialda 70 texnik-oseminatorlardıń mamanlıǵı arttırıldı
Mámleketimizde sharwashılıq tarmaǵın zamanagóy kózqaraslar tiykarında rawajlandırıw, násilshilik jumısların jetilistiriw hám tarawǵa ilimiy jetiskenliklerdi keńnen engiziwge ayrıqsha itibar qaratılmaqta. Ásirese, aymaqlarda jumıs alıp barıp atırǵan qánigelerdiń bilim hám ámeliy kónlikpelerin turaqlı jańalap barıw tarmaq nátiyjeliligin arttırıwda áhmiyetli faktorlardan biri bolıp esaplanadı. Usı maqsette Ózbekstan Respublikası Prezidentiniń 2026-jıl 12-maydaǵı "Sharwashılıq tarmaǵı hám jaylaw xojalıǵın zamanagóy basqarıw sisteması hám jańasha kózqaraslar tiykarında rawajlandırıw ilajları haqqında"ǵı PQ-179-sanlı qararınıń orınlanıwı sheńberinde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında jasalma tuqımlandırıw (texnikalıq-oseminatorlıq) boyınsha on kúnlik qánigeligin arttırıw seminarı shólkemlestirildi.
Seminarǵa Qaraqalpaqstan Respublikasınıń barlıq qala hám rayonlarında jumıs alıp barıp atırǵan 70 texnik-oseminator qatnastı. Oqıw baǵdarlaması veterinariya, reproduktiv biotexnologiya hám násilshilik tarawındaǵı zamanagóy ilimiy qatnaslar tiykarında qáliplestirilip, teoriyalıq sabaqlar ámeliy sabaqlar menen úylestirildi. Tıńlawshılar tuqımlıq materialdıń morfologiyalıq kórsetkishleri hám háreketsheńligin bahalaw, biomateriallardı tayarlaw hám saqlaw texnologiyaları, kriokonservaciya usılları, jasalma tuqımlandırıwda qollanılatuǵın zamanagóy ásbap-úskeneler menen islew hám reproduktiv processlerdi basqarıw boyınsha ámeliy kónlikpelerdi iyeledi. Shınıǵıwlarǵa Samarqand mámleketlik veterinariya medicinası, sharwashılıq hám biotexnologiyalar universitetiniń professorı B.Eshburiyev, Samarqand qalasındaǵı Veterinariya qánigelerin qánigeligin arttırıw institutınıń wákili Sh.Urazov hám filialdıń tájiriybeli professor-oqıtıwshıları tartıldı. Seminar dawamında teoriya hám ámeliyattıń únlesligi qatnasıwshılarǵa hár bir texnologiyanı jumıs processinde qollanıw, ámeliy tájiriybeni bekkemlew hám zamanagóy qatnaslardı ózlestiriw imkaniyatın berdi. Bul baǵdardaǵı oqıwlar qatnasıwshılardıń tarawǵa baylanıslı ámeliy bilimlerin jáne de bayıttı.
Seminar sertifikat tapsırıw máresimi menen juwmaqlandı. Onda filial direktorı, professor A.Esimbetov, Qaraqalpaqstan Respublikası Ministrler Keńesi Baslıǵınıń jaylawlardan nátiyjeli paydalanıwdı shólkemlestiriw, sharwa ot-jem bazasın bekkemlew hám sharwashılıqtı rawajlandırıw máseleleri boyınsha birinshi orınbasarı F.Nurmuxammedov hám Qaraqalpaqstan Respublikası Veterinariya hám sharwashılıqtı rawajlandırıw komiteti baslıǵınıń orınbasarı Q.Pirnazarov qatnastı. Ilaj dawamında qánigelik arttırıw kursın tabıslı juwmaqlaǵan 70 texnik-oseminatorǵa sertifikatlar saltanatlı túrde tapsırıldı. Endi olar seminar dawamında iyelegen bilim hám ámeliy kónlikpelerin Qaraqalpaqstan Respublikasınıń qala hám rayonlarındaǵı sharwashılıq xojalıqlarında ámeliyatqa engizedi. Bul tájiriybe arttırıw seminarı Prezident qararında belgilengen wazıypalardı izbe-iz ámelge asırıw, násilshilik sistemasına zamanagóy qatnaslardı keńnen engiziw hám tarawda maman texnik-oseminatorlardıń jumısın bunnan bılay da rawajlandırıwǵa qaratılǵan ámeliy jumıslardan biri boldı.
