Nukusdagi “Do‘stlik festivali” oliy ta’lim muassasalarini bir nuqtada jamladi
04 июн 2026
SAMARQAND DAVLAT VETERINARIYA
MEDITSINASI, CHORVACHILIK VA
BIOTEXNOLOGIYALAR UNIVERSITETI
NUKUS FILIALI
-
Telefon
+998 61 224 71 09
-
E-mail
samvminf@edu.uz
Ata-analar kongressi: Jaslar tárbiyasında birge islesiw hám juwapkershilik
Házirgi globallasıw processleri háwij alıp baratırǵan dáwirde jaslardıń sanası hám oy-pikirin saqlaw, olardı Watanǵa sadıqlıq, milliy qádiriyatlarǵa húrmet ruwxında tárbiyalaw máselesi mámleketlik siyasattıń eń tiykarǵı wazıypalarınan birine aylanbaqta. Sebebi jámiyettiń erteńgi kúni — ruwxıy jetik, erkin pikirleytuǵın hám eldiń táǵdirine tiyislilik sezimi menen jasaytuǵın jaslardıń qolında. Usı múnásibet penen, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında shólkemlestirilgen Ata-analar kongressi jaslar tárbiyası, olardıń ruwxıy jetilisiwi hám keleshegine baylanıslı áhmiyetli máseleler dodalanǵan ilajlardan biri boldı. Kongress aldınan studentlerdiń ata-anaları filialda jaratılǵan sharayatlar menen tanıstı.
Olar málimleme-resurs orayları, oqıw laboratoriyaları, vivariyler hám studentler ushın jaratılǵan imkaniyatlardı kózden ótkerip, bilimlendiriw processine jańasha jantasıwlar engizilip atırǵanınıń gúwası boldı. Bunnan soń filial májilisler zalında kongresstiń tiykarǵı bólimi bolıp ótti. Onı filial direktorı, professor A.Esimbetov alıp bardı. Ushırasıwda búgingi kúnde jaslardı hár tárepleme qollap-quwatlaw, olardıń intellektuallıq potencialı hám ruwxıy dúnyaqarasın joqarılatıw baǵdarında ámelge asırılıp atırǵan jumıslar haqqında pikir bildirildi. Atap ótilgenindey, globallasıw processleri kúsheyip baratırǵan házirgi dáwirde jaslardı hár qıylı jat ideyalar tásirinen qorǵaw, olardıń bos waqıtların mazmunlı shólkemlestiriw, kitapqumarlıq hám ilimge qızıǵıwshılıǵın arttırıw áhmiyetli wazıypalardan biri bolıp esaplanadı. Bul jolda ata-ana hám bilimlendiriw mákemesi arasındaǵı birge islesiw sheshiwshi áhmiyetke iye. Kongress sheńberinde ata-analar menen ashıqtan-ashıq pikirlesiw shólkemlestirildi. Sáwbetlesiwler processinde studentlerdiń tálim-tárbiyası hám ruwxıy ortalıǵın jáne de bekkemlewge baylanıslı pikir-usınıslar bildirildi. Ilaj dawamında bilimlendiriw, ilim hám jámiyetlik jumıslarda belsene qatnasıp atırǵan qábiletli student-jaslardıń ata-anaları alǵısnama menen sıylıqlandı.
—Qızım pitkeriwshi kurs studenti. Bıyılǵı oqıw jılında Tólepbergen Qayıpbergenov atındaǵı mámleketlik stipendiya iyesi boldı. Bul ustazlardıń miyneti hám bergen bilimleriniń jemisi — deydi Gulzar Alieva. — Filialda jaslar ushın jaratılǵan sharayatlardı kórip, kewlimiz jáne de qáterjam boldı. Bul kongress ata-ana, bilimlendiriw mákemesi hám jámiyet arasındaǵı birge islesiwdi jáne de bekkemlewge xızmet etti. Eń tiykarǵısı, bunday ushırasıwlar jaslar tárbiyasına baylanıslı juwapkershilikti jáne bir márte tereń seziniwge iytermeleytuǵını menen áhmiyetli bolıp esaplanadı.
