Yoshlar bilan uchrashuv doirasida V Respublika Yoshlar forumi g‘oliblari taqdirlandi
17 апр 2026
SAMARQAND DAVLAT VETERINARIYA
MEDITSINASI, CHORVACHILIK VA
BIOTEXNOLOGIYALAR UNIVERSITETI
NUKUS FILIALI
-
Telefon
+998 61 224 71 09
-
E-mail
samvminf@edu.uz
Ilimge umtılǵan jaslar menen mazmunlı ushırasıw ótkerildi
"Jaslar kúni" múnásibeti menen Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında student-jaslar qatnasıwında ashıq ushırasıw shólkemlestirildi. Ilaj qızǵın hám erkin pikirlesiw ruwxında ótip, jaslardıń pikir-usınısları, umtılısları hám keleshektegi rejeleri keńnen dodalandı. Ushırasıw dawamında filial direktorı A.Esimbetov student-jaslar menen tikkeley sáwbetlesip, olardıń oqıw processi, ilimiy izlenisleri hám kúndelikli jumısına baylanıslı máselelerge ayrıqsha itibar qarattı.
Bildirilgen pikir-usınıslar tiykarında bilimlendiriwdiń sapasın bunnan bılay da arttırıw, jaslardı qollap-quwatlawǵa qaratılǵan baǵdarlar haqqında pikir júrgizildi. Ilaj sheńberinde Qaraqalpaqstan Respublikası Innovaciyalıq rawajlanıw bóliminiń qánigesi E.Abdiganiyevtiń qatnasıwında seminar ótkerildi. Onda jas ilimpazlar, tayanısh doktorantlar, erkin izleniwshiler hám magistrantlar ushın ilimiy jumıstı rawajlandırıwǵa xızmet etetuǵın áhmiyetli baǵdarlama hám tańlawlar haqqında hár tárepleme maǵlıwmatlar usınıldı.
Atap aytqanda, Innovaciyalıq rawajlanıw agentligi tárepinen járiyalanatuǵın "Bolajaq ilimpaz" tańlawı, "Akademiyalıq háreketsheńlik" baǵdarlaması, ilimiy joybarlar tańlawları jáne sırt mámleketlerde ilimiy stajirovka ótew tártibi hám talapları tolıq túsindirildi. Bul maǵlıwmatlar jas izertlewshilerdiń ilimiy potencialın arttırıw, olardı xalıqaralıq kólemdegi ilimiy processlerge tartıwda úlken áhmiyetke iye ekeni atap ótildi.
Ilaj juwmaǵında qatnasıwshılar ózlerin qızıqtırǵan sorawlarǵa juwap alıp, ilimiy jumıstı nátiyjeli jolǵa qoyıw boyınsha zárúr usınıslarǵa iye boldı. Ashıq hám mazmunlı ótken ushırasıw jaslardıń izleniwge bolǵan qızıǵıwshılıǵın jáne de bekkemledi, olardı jańa sheklerge qaray isenimli umtılıwǵa ruwxlandırdı.
