Jańa jıl qutlıqlawı
Áziz hám húrmetli filial jámááti!
Qádirli professor-oqıtıwshılar, izleniwshiler, xızmetkerler hám áziz student-jaslar!
2025-jıl filialımız ushın bereketli hám nátiyjeli jıl boldı. Ótip baratırǵan jıl bilimlendiriw, ilim, mánawiyat, sport hám xalıqaralıq birge islesiw baǵdarlarında áhmiyetli jetiskenlikler menen belgilendi. Bul jetiskenlikler filialdıń ilimiy potencialın, jámáátimizdiń pidákerlik miynetin, birligi hám awızbirshiligin de kórsetti.
2025-jılı filialda jámi 58 professor-oqıtıwshı jumıs alıp bardı. Olardıń 50,8 procenti ilimiy dárejege iye bolıp, bul kórsetkish filialda qáliplesken ilimiy ortalıqtıń bekkemligin ayqın kórsetedi. Sonıń ishinde, 4 ilim doktorı (DSc), 4 ilim kandidatı, 22 filosofiya doktorı (PhD) ilimiy-pedagogikalıq jumıs alıp barmaqta. Jas PhD kadrlardıń úlesi artıp baratırǵanı ilimiy áwladlardıń almasıwı támiyinlenip atırǵanınan dárek beredi. Professor-oqıtıwshılardıń orta jastaǵı tájiriybesi hám innovaciyalıq pikirdiń úylesimi bilimlendiriwdiń sapasın arttırıwda áhmiyetli rol atqardı.
Filialda 2025-jılı ilimiy-izertlew jumıslarınıń nátiyjeliligi sezilerli dárejede arttı. Respublikalıq hám xalıqaralıq konferenciyalarda professor-oqıtıwshılarımız belsene qatnastı, ilimiy jumıslarımız xalıqaralıq maydanda tán alındı. Ilimiy-izertlew baǵdarlamaları hám xojalıq shártnamaları sheńberinde 13 shártnama tiykarında 60 million sumlıq jumıslar ámelge asırıldı. UNDP menen birgelikte iri qara maldıń ónimdarlıǵın arttırıw, ilimiy tiykarlanǵan azıqlandırıw racionların islep shıǵıw hám ámeliyatqa engiziw boyınsha 121 million sumlıq jumıslar orınlandı. Britaniyanıń "The Biologists Company" kompaniyası tárepinen 2 000 funt sterling muǵdarında grantlar tartıldı.
Filialımızdıń professor-oqıtıwshıları Qıtay, Rossiya hám Qırǵızstanda xalıqaralıq ilimiy ilajlarda qatnasıp, aldınǵı tájiriybelerdi úyrendi, innovaciyalıq texnologiyalardı ózlestirdi. Google Scholar bazasında h-indeksi 5 hám onnan joqarı bolǵan professorlar sanı artıp, filialdıń ilimiy abırayı bekkemlendi.
2025-jılı bir qatar professorlarımız joqarı mámleketlik hám jámiyetlik sıylıqlar menen sıylıqlandı:
— Sh.Avezimbetov hám R.Aytjanov "Watan pidáyisı" kókirek belgisi menen;
— R.Aytjanov "Ózbekstan Respublikası Awıl xojalıǵı pidáyisı" kókirek belgisi menen;
— A.Urimbetov Turan Ilimler Akademiyasınıń "Akademik" kókirek belgisi menen;
— Q.Sársenbaev "Úmit ushqını" kókirek belgisi menen;
Sonday-aq, Málimleme xızmetiniń basshısı Z.Xojamuratova "Úmit ushqını" kókirek belgisi menen sıylıqlandı. Jas kadr bolıwına qaramastan, ol Qaraqalpaqstan Respublikası Joqarǵı Keńesi tárepinen qısqa múddet ishinde ekinshi márte tán alınıwı, Z.Xojamuratovanıń pidákerlik hám nátiyjeli miynetiniń nátiyjesi bolıp tabıladı. Bul sıylıqlar tek ǵana ustazlarımızdıń jeke jetiskenligi emes, al filialdıń abırayı hám jámááttiń pidákerlik miyneti sıpatında qádirlenedi.
2025-jılı filialımız studentleri ilimiy, intellektuallıq, ruwxıy hám sport baǵdarlarında belsene qatnastı. Aprel ayında IV Respublikalıq "Jaslar forumı" sheńberinde ótkerilgen pán olimpiadasında filialımızdan 1-orındı 2 student, 2-orındı 6 student hám 3-orındı 3 studentimiz jeńip aldı. Forum dawamında "Eń jaqsı plakat" tańlawında 1-orın, "Zakovat" intellektuallıq oyınında 1-orın, "Debat" tańlawında 1-orın, "Studentler teatr studiyası" tańlawında 1-orın, "Kitapqumarlıq" tańlawında 1-orın hám stol tennisi boyınsha sport jarısında 2-orın iyeledi. Sonday-aq, Qaraqalpaqstan Respublikası joqarı bilimlendiriw mákemeleriniń studentleri arasında ótkerilgen "Munozara debat" tańlawında 1-orın, "Máripat maydanı" tańlawında 2-orın, "Studentler ligası" badminton jarısında 3-orın, "Bes baslama olimpiadası" sheńberinde 2-orın, Ferǵanada sporttıń oq jaydan oq atıw boyınsha "Ózbekstan kubogi"nda 1-orın hám noyabr ayında "Kiberqáwipsizlik aylıǵı" videorolikler tańlawında 3-orındı iyeledi.
Ulıwma, 65 student xalıqaralıq onlayn olimpiadalarda, 16 student respublika olimpiadalarında sıylı orınlardı qolǵa kirgizdi. 22 student "Mırza Ulıǵbek miyrasxorları" startap joybarlar tańlawına qatnastı, sonnan 12 student rayon hám qala basqıshında jeńimpazlıqtı qolǵa kirgizdi, 6 student Respublikalıq basqıshqa jollama alıp belsene qatnastı hám 6 student "Úmit ushqını" kókirek belgisi menen sıylıqlandı.
Bunnan tısqarı, filialda jıl dawamında 5 respublikalıq hám 1 xalıqaralıq ilimiy konferenciya, 19 Scopus hám Web of Sciyence jurnallarında maqalalar, 50 Respublikalıq VAK ilimiy jurnalında maqalalar, 101 IMPACT faktorısız xalıqaralıq ilimiy jurnal maqalaları basıp shıǵarıldı. Professor-oqıtıwshılarımız tárepinen 5 xalıqaralıq hám respublikalıq kólemdegi oylap tabıw hám paydalı modellerge patentler alındı.
Áziz kásiplesler hám studentler!
Jańa 2026-jıl qarsańında artqa názer taslar ekenbiz, erisilgen barlıq jetiskenliklerimiz keleshektegi úlken shekler ushın bekkem tiykar bolıp xızmet etedi. Aldımızda jáne de úlken maqsetler, juwapkershilikli wazıypalar tur hám biz olardı álbette birgelikte ámelge asıramız.
Bársheńizdi kirip kiyatırǵan Jańa jıl menen shın kewlimnen qutlıqlayman. Sizlerge bekkem densawlıq, shańaraqlıq baxıt, tınıshlıq-tatıwlıq, ilimiy hám dóretiwshilik jumısıńızda úlken tabıslar tileymen. Filialımızdıń rawajlanıwı jolında islep atırǵan nátiyjeli hám pidákerlik miynetińiz ushın tereń minnetdarshılıq bildiremen.
Jańa jıl bárshemizge qutlı bolsın!
Húrmet penen,
Filial direktorı, professor A.Esimbetov
скачать dle 12.1
Telefon
E-mail
