Jol háreketi qáwipsizligi hám sergeklik mádeniyatı - jaslar itibarında

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında student-jaslar arasında jol háreketi mádeniyatın arttırıw, qáwipsizlik qaǵıydalarına ámel etiw hám ayrıqsha jaǵdaylarda durıs jol tutıw boyınsha gezektegi úgit-násiyat ilajı ótkerildi. Ilajdı Jaslar máseleleri hám ruwxıy-aǵartıwshılıq isleri boyınsha direktordıń birinshi orınbasarı X.Abdijaliyev ashıp berip, jol háreketi qáwipsizligi hár bir puqaranıń turmısında tikkeley juwapkershilikti talap etetuǵın taraw ekenin atap ótti. 

Ol studentlerdiń bul máselege ayrıqsha qatnas jasawı tek ǵana óziniń ómiri emes, al átiraptaǵılardıń tınıshlıǵı ushın da áhmiyetli ekenligin ayrıqsha atap ótti. Bunnan soń Qaraqalpaqstan Respublikası Ishki isler ministrligi Jol háreketi qáwipsizligi basqarması inspektorı, qatardaǵı T.Qurbanbaev hám Ayrıqsha jaǵdaylar basqarması bólim baslıǵı, kapitan Erbol Juzbaev jaslarǵa jol háreketi qaǵıydalarına ámel etiw, tezlikti normada saqlaw, más halda transport basqarmaw sıyaqlı áhmiyetli máseleler boyınsha túsinik berdi. Sonday-aq, ilaj qatnasıwshılarına tábiyǵıy gaz hám elektr úskenelerinen paydalanıwda qáwipsizlik qaǵıydalarına ámel etiw, nasaz ásbap-úskenelerden paydalanbaw hám qáwipli jaǵdaylar júzege kelgende tiyisli xızmetlerge dárhal xabar beriw zárúr ekenligi esletip ótildi. Ushırasıw sońında studentlerge jol háreketi hám qáwipsizlik mádeniyatına baylanıslı videorolikler kórsetilip, soraw-juwap túrinde sáwbetlesiw ótkerildi. Bul ilaj jaslardıń sanasında sergeklik, tártip-intizam hám juwapkershilik sezimin bekkemlewge xızmet etti.