Veterinariya tarawındaǵı ilimiy birge islesiw jańa basqıshta

Ózbekstan Respublikası Veterinariya hám sharwashılıqtı rawajlandırıw mámleketlik komitetiniń 2025-jıl ushın jol kartası sheńberinde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında tarawlıq tájiriybe almasıwǵa qaratılǵan ámeliy seminar bolıp ótti. Seminar Samarqand veterinariya ilimiy-izertlew institutınıń qus, qoyan, balıq hám pal hárre kesellikleri laboratoriyasınıń qánigeleri tárepinen shólkemlestirildi. Ilajda Qaraqalpaqstan Respublikasınıń bir qatar rayonlarınan kelgen juwapker veterinariya shıpakerleri, tarawda jumıs alıp barıp atırǵan xızmetkerler, sonday-aq, filial professor-oqıtıwshıları hám studentleri qatnastı. Seminardıń tiykarǵı maqseti - veterinariya tarawındaǵı ilimiy jańalıqlardı ámeliyatqa engiziw, zamanagóy diagnoz hám profilaktika usılların keńnen qollanıw hám qánigelerdiń mamanlıǵın arttırıwdan ibarat boldı. Ilaj dawamında laboratoriya qánigeleri haywanlardıń keselliklerin erte anıqlaw, olardıń aldın alıw hám nátiyjeli emlew boyınsha aldınǵı usıllar haqqında hár tárepleme maǵlıwmat berdi. Sonıń menen birge, qus, qoyan, balıq hám pal hárreshi xojalıqlarında baqlanıp atırǵan infekciyalıq keselliklerdiń kelip shıǵıw sebepleri, olardı saplastırıw jolları jáne biotexnologiyalıq qatnaslar boyınsha ámeliy usınıslar usınıldı. Seminar qatnasıwshıları usı ilaj arqalı teoriyalıq bilim hám ámeliy kónlikpelerin bekkemlep, ilimiy birge islesiwdi jáne de rawajlandırıw, tarawlıq innovaciyalar hám tájiriybe almasıwdı jolǵa qoyıw boyınsha pikir almastı. Filialda ótkerilgen bul ilaj veterinariya sistemasında ilim hám ámeliyattıń úylesimliligin támiyinlew jolındaǵı áhmiyetli qádem sıpatında tán alındı.