Húrmetli ustazlarǵa filial direktorınıń qutlıqlawı
1-oktyabr - "Muǵallimler hám ustazlar kúni" múnásibeti menen siz, áziz ustazlardı, filialda pidayı miynet etip kiyatırǵan barlıq professor-oqıtıwshılar hám elimizdegi barlıq pedagoglardı shın júrekten qutlıqlayman!
Elimizde sońǵı jıllarda tálim-tárbiya sistemasın túp-tiykarınan jańalaw, onı zamanagóy talaplar tiykarında rawajlandırıw mámleketlik siyasattıń eń áhmiyetli baǵdarlarınan biri bolıp qaldı.
Prezidentimizdiń basshılıǵında muǵallimlerdiń statusı, pedagogikalıq jumıstıń abırayı, olardıń miynetin xoshametlew hám qollap-quwatlaw máseleleri eń tiykarǵı wazıypalar qatarına qoyılǵanın bárshemiz tereń sezip atırmız.
Joqarı bilimlendiriw sisteması wákilleri ushın jaratılıp atırǵan jańa imkaniyatlar, ilimiy izleniwlerge keńnen jol ashılıp atırǵanı, ustazlardıń materiallıq hám ruwxıy qollap-quwatlanıp atırǵanı - bulardıń barlıǵı ustazlıq kásibine bolǵan joqarı húrmet hám itibardıń ayqın dálili bolıp esaplanadı. Búgin biz maqtanısh penen atap ótemiz, Nókis filialında 50 den aslam tájiriybeli, pidayı professor-oqıtıwshılar jaslarımızǵa tek ǵana bilim emes, al turmıslıq sabaq, tárbiya hám mánawiyat berip kelmekte. Ásirese, sońǵı jılları ilimiy dárejege iye pedagoglarımızdıń qatarı sezilerli dárejede keńeydi - búgingi kúnde oqıtıwshılardıń derlik 45 procenti ilimiy ataqqa iye.
Bul kórsetkish tek ǵana filialdıń emes, al pútkil bilimlendiriw sistemasınıń rawajlanıwınan dárek beredi. Bul jetiskenliklerde siz, áziz ustazlardıń pidákerlik miyneti, izleniwi hám isenimi jámlengen. Húrmetli ustazlar! Sizler bárqulla jámiyetimizdiń ruwxıy jetekshisi, keleshegimizdiń dóretiwshisisiz. Sizlerdiń mashaqatlı miynetińiz sebepli elimizdiń erteńgi kúni - jaslarımız joqarı bilimli, keń dúnyaqarasqa iye, watansúygish qánigeler bolıp kamalǵa kelmekte. Ustazlıq - eń ullı hám maqtanıshlı kásip, sizlerdiń hár birińiz bul ataqtı múnásip atqarıp kelmekte.
Usı ullı áyyyamda sizlerge bekkem densawlıq, shańaraqlarıńızǵa abadanlıq, iygilikli maqsetlerińizde dawamlı tabıslar tileymen. Hár bir islegen miynetińizdiń nátiyjesin kórip, shákirtlerińizdiń jetiskenlikleri menen maqtanıp júriwińizdi qáleymen. Bayramıńız múbárek bolsın, áziz ustazlar!
Húrmet penen,
Filial direktorı, professor A.Esimbetov
скачать dle 12.1
Telefon
E-mail
