Shańaraqta hayal-qızlardıń ornı" temasında sheberlik sabaǵı shólkemlestirildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında "Áhmiyetli 90 kún" sheńberinde sociallıq-ruwxıy baǵdardaǵı gezektegi ilaj joqarı dárejede shólkemlestirildi.

Bul sheberlik sabaǵı filialdıń Hayal-qızlar máseleleri boyınsha direktor másláhátshisi Z.Dawletova basshılıǵında "Shańaraqta hayal-qızlardıń ornı" atamasında ótkerilip, onda filialdıń professor-oqıtıwshıları, student-jasları hám xızmetkerleri belsene qatnastı.

Ilajdıń tiykarǵı maqseti - jas áwlad, atap aytqanda, hayal-qızlardıń shańaraq institutındaǵı tutqan ornı, olardıń sociallıq belsendiligi, ruwxıy-aǵartıwshılıq tárbiyası, sonday-aq, zamanagóy jámiyette tutqan ornın tereń analizlew hám bekkemlewden ibarat boldı.

Z.Dawletova óziniń shıǵıp sóylegen sózinde hayaldıń shańaraqtaǵı roli tek ǵana perzent tárbiyası emes, al jámiyettiń ádep-ikramlılıq-ruwxıy turaqlılıǵı ushın da sheksiz áhmiyetke iye ekenin ayrıqsha atap ótti.

Ilaj dawamında qatnasıwshılar óz pikir-usınısların bildirdi. Jas qızlarǵa turmısta óz ornın tabıw, zamanagóy jámiyette belsendi bolıw, ózin-ózi rawajlandırıw hám jámiyetlik turmısta jetekshilikti qolǵa kirgiziw boyınsha paydalı másláhátler berildi.

Sonday-aq, xalqımızdıń qádiriyatlarında hayal-qızlarǵa bolǵan húrmet, analıq tımsalı hám mehir-múriwbet túsinikleri de áhmiyetli orın ieleytuǵını haqqında pikir almasıldı.

Ashıqtan-ashıq sóylesiw tárizinde shólkemlestirilgen ilaj soraw-juwaplar, interaktiv sáwbetler menen jáne de janlı ruwxta ótti.

Studentler bul ushırasıwdan tereń tolqınlanıw hám unamlı tásirler menen qayttı.

Bunday ruwxıy-aǵartıwshılıq ilajlar jas áwladtı hár tárepleme bárkamal insan etip tárbiyalawda, hayal-qızlardıń jámiyettegi ornın bekkemlewde úlken áhmiyetke iye.