SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Dóretiwshilikke tolı maydan - balalar qıyalınıń reńli jilwası

Búgin jas áwlad qálbin gózzallıq, jaqsılıq hám dóretiwshilik ruwxında tárbiyalaw jámiyet aldındaǵı eń áhmiyetli wazıypalardan biri bolıp esaplanadı. Ásirese, búgingi jedel málimleme hám texnologiyalar ásirinde balalardıń qıyal dúnyasın, kórkem-estetikalıq talǵamın qáliplestiriwge qaratılǵan baslamalar sheksiz áhmiyetke iye bolmaqta.
Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında "Áhmiyetli 90 kún" baslaması sheńberinde mine usınday iygilikli maqsetlerge xızmet etetuǵın jáne bir jarqın ilaj shólkemlestirildi. Respublikalıq "Bárkamal áwlad" balalar mektebi menen birgelikte ótkerilgen bul jarıs súwretshilik baǵdarında bilim alıp atırǵan jas dóretiwshilerdiń talantın júzege shıǵarıw, olardı ilhamlandırıw hám kórkem ónerge bolǵan súyispenshiligin arttırıwǵa qaratıldı.

Ilajdı Jaslar máseleleri hám ruwxıy-aǵartıwshılıq isleri boyınsha direktor orınbasarı X.Abdijaliyev ashıp berip, bunday baslamalardıń jaslardıń ruwxıy dúnyasın joqarılatıwdaǵı ornı haqqında aytıp ótti. Ol balalarda kórkem pikirlew, súwretlew talǵamı, miynet hám sabır-taqat sıyaqlı pazıyletlerdi qáliplestiriwde kórkem ónerdiń sheksiz kúshine itibar berdi. Jarıstıń ózine tánligi sonda, ol ádettegi auditoriyalarda emes, al ashıq aspan astında - filial aymaǵındaǵı asfalt maydanında ótkerildi. Sol sebepli bul process "Asfaltta súwret salıw" atı menen kórkemlestirildi.

Bul jer, misli balalar qıyalı ushın ashılǵan úlken maydanǵa aylandı. Hár bir súwrette - quyash nurı, tábiyat gózzallıǵı, adamgershilik, miyrim-shápáát, tınıshlıq hám doslıq sıyaqlı joqarı túsinikler jámlengen edi. Reńler bolsa olar arqalı tilge kirgen arzıwlar, tilekler hám sananıń kórinisi edi.

Jas xudojniklerdiń qolında ápiwayı porlar kórkem óner quralına aylandı. Hár bir sızıq - júrek ırǵaǵı, hár bir reń - balalıq qıyalları, arzıw-niyetleri hám isenimi menen toltırıldı. Olardıń arasında haywanatlar dúnyası, ana tábiyat kórinisleri, iygilikli ideyalar sáwlelendirilgen súwretler ayrıqsha itibarǵa iye boldı.
Ilaj sońında belsene qatnasqan qatnasıwshılarǵa estelik sawǵaları tapsırıldı. Bul olardı quwandırıp ǵana qoymastan, al dóretiwshilikke bolǵan qızıǵıwshılıǵın jáne de arttırdı.
Bunday ilajlar jas áwladtıń sanasın bayıtıw, olardı erkin pikirleytuǵın, kórkem ónerdi qádirleytuǵın, ruwxıy jetik shaxs etip tárbiyalawda úlken orın iyeleydi. "Áhmiyetli 90 kún" sheńberindegi bunday baslamalar bolsa jaslardıń bos waqtın mazmunlı shólkemlestiriwde, olardıń talantın ashıwda áhmiyetli orın iyelemekte.