SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Áhmiyetli 90 kún" sheńberinde - startaplar hám jańa imkaniyatlar

"Áhmiyetli 90 kún" sheńberinde studentlerdiń bos waqtın mazmunlı shólkemlestiriw, olardı innovaciyalıq pikirlewge baǵdarlaw, sonday-aq, zamanagóy bilim hám kónlikpelerdi ámeliyatta qollanıwǵa xoshametlew maqsetinde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında gezektegi ilaj bolıp ótti.

Filialda "Ziyrek studentler biznes ideyaları hám startap joybarların qollap-quwatlaw" atamasında master-klass shólkemlestirildi. Bul sabaq jaslar arasında startap mádeniyatın qáliplestiriw, olardıń ilimiy-isbilermenlik potencialın júzege shıǵarıw, sonday-aq, zamanagóy biznes ideyalarǵa bolǵan qızıǵıwshılıqtı kúsheytiwge xızmet etti. Ilajda Nókis jaslar texnoparki - "Inno-X" biznes-inkubatorınıń mentorı E.Kereev, "Ziyrek studentler" ilimiy-isbilermenlik jumısın shólkemlestiriw bóliminiń baslıǵı A.Janabaev hám filialdıń intalı hám izleniwsheń student-jasları qatnastı.
Master-klass dawamında zamanagóy biznes ortalıǵında tabıslı startap joybarlardı jaratıw basqıshları, kreativ pikirlew tiykarları, investorlar menen sóylesiw kónlikpeleri, sonday-aq, básekige shıdamlı ónim yamasa xızmetlerdi jaratıw usılları haqqında hár tárepleme maǵlıwmat berildi. Itibarlı tárepi sonda, ilaj interaktiv tárizde shólkemlestirilip, qatnasıwshılar óz ideyaları tiykarında kishi toparlarda islew, olar ústinde pikir júrgiziw hám prezentaciya qılıw imkaniyatına iye boldı.

Bul bolsa olardıń jámáátte islesiw kónlikpesin bekkemlep, real biznes joybarlar ústinde islewge tayarlaydı. Bul baslama "Áhmiyetli 90 kún" joybarı sheńberinde alıp barılıp atırǵan keń kólemli jumıslarǵa áhmiyetli úles bolıp xızmet etpekte. Ásirese, innovaciyalıq pikirge iye, startap joybarlarǵa qızıqqan jaslardı qamtıp alıw arqalı tek ǵana olardıń qábiletin júzege shıǵarıwǵa emes, al keleshektegi kásiplik baǵdarın durıs belgilewge de tiykar jaratılmaqta.

Filialda bunday ilajlar turaqlı ótkerilip, hár bir jasqa óz potencialın kórsetiw, ámeliy bilim hám kónlikpelerin bekkemlew imkaniyatı jaratılmaqta. Sebebi, erteńgi kún iyesi bolǵan jas áwladtıń hár tárepleme jetik hám básekige shıdamlı bolıp kamalǵa keliwi ushın bunday baslamalar ayrıqsha áhmiyetke iye.