SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Azıq-awqat qáwipsizliginde innovaciyalıq texnologiyalar: nátiyjeli sheshimler hám perspektivalı jantasıwlar

Búgingi kúnde azıq-awqat qáwipsizligin támiyinlew máselesi global kólemde úlken áhmiyetke iye bolmaqta. Atap aytqanda, ekonomikalıq turaqlılıq, xalıqtıń salamatlıǵı hám milliy qáwipsizlik sistemasında bul baǵdar strategiyalıq áhmiyetke iye. Usı jıldıń 27-iyun kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı "Ekonomika hám gumanitar ilimler" kafedrası tárepinen "Respublikamızda azıq-awqat qáwipsizligin támiyinlewde innovaciyalıq texnologiyalardan nátiyjeli paydalanıw jolları hám sheshimleri" atamasında ilimiy-ámeliy konferenciya shólkemlestirildi. Konferenciyada Qaraqalpaqstan Respublikası Joqarǵı Keńesi Baslıǵınıń isbilermenlik hám investiciyalar boyınsha másláhátshisi, Qaraqalpaqstan Respublikası Veterinariya hám sharwashılıqtı rawajlandırıw komitetiniń basshıları, Sawda-sanaat palatasınıń Qaraqalpaqstan Respublikası basqarmasınıń wákilleri, respublikamızdıń túrli joqarı oqıw orınlarınıń professor-oqıtıwshıları hám jas ilimpazlar qatnastı.

Bunnan tısqarı, qońsı mámleketlerdiń jetekshi joqarı oqıw orınları da ánjumanda onlayn tárizde qatnasıp, óz pikir-usınısların bildirip ótti. Ilajdı filial direktorı, professor A.Esimbetov ashıp berdi. Óziniń shıǵıp sóylegen sózinde ol azıq-awqat qáwipsizligin támiyinlew jolında zamanagóy texnologiyalardı engiziw, óndiristiń hár bir basqıshında sanlı qatnastı engiziw hám innovaciyalıq sheshimler tiykarında jergilikli subektlerdiń jumısın jetilistiriw zárúrligin ayrıqsha atap ótti. Konferenciyaǵa usınılǵan 50 den aslam ilimiy maqalalar arasında zamanagóy texnologiyalardı azıq-awqat islep shıǵarıwǵa integraciyalaw, agrotexnikalıq qurallardan aqılǵa uǵras paydalanıw, logistika shınjırlarındaǵı innovaciyalıq sheshimler, azıq-awqat sapasın monitoring etiwde jasalma intellekt texnologiyalarınıń ornı sıyaqlı áhmiyetli máseleler tereń tallandı. "Ekonomika hám gumanitar pánler" kafedrasınıń aǵa oqıtıwshısı, ekonomika ilimleri boyınsha filosofiya doktorı (PhD) P.Allaniyazov konferenciyada shıǵıp sóylep, Ózbekstannıń arqa aymaqlarında, atap aytqanda Qaraqalpaqstanda azıq-awqat qáwipsizligin támiyinlewde qusshılıq tarawındaǵı innovaciyalıq kózqaraslardıń ornı haqqında bayanat jasadı. Ol jergilikli subektler arasındaǵı birge islesiw, mámleket tárepinen jaratılıp atırǵan xoshametlew mexanizmleri, investiciyalardıń aqılǵa uǵras baǵdarlanıwı hám ishki talaptı tereń úyreniw tiykarında nátiyjelilikke erisiw múmkin ekenligin tiykarlap berdi. Konferenciya qatnasıwshıları óz bayanatlarında azıq-awqat qáwipsizligin támiyinlew tek ǵana ekonomikalıq mashqalalardı sheshiwge emes, al ekologiyalıq turaqlılıqtı, xalıqtıń salamatlıǵın hám sociallıq turaqlılıqtı támiyinlewge xızmet etetuǵının atap ótti.

Ásirese, klimat ózgeriwi sharayatında resurslardan nátiyjeli paydalanıw hám innovaciyalıq sheshimlerge tiykarlanǵan sistema zárúr ekenligi atap ótildi. Ilaj sońında belsene qatnasqan qatnasıwshılarǵa sertifikatlar tapsırıldı. Konferenciya materialları tiykarında ilimiy toplam tayarlanıwı rejelestirilmekte. Bul konferenciya - ilim, innovaciya hám ámeliyattıń úylesimliliginde jańa basqısh bolıp, respublikamız azıq-awqat qáwipsizligi tarawındaǵı strategiyalıq qararlar ushın bekkem ilimiy tiykar jarattı.