SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Xızmetkerlerdiń miynet huqıqları - áhmiyetli tema sıpatında dodalawda

Mámleketimizde insan huqıqları menen erkinliklerin támiyinlew, xızmetkerlerdiń nızamlı máplerin qorǵaw mámleketlik siyasattıń tiykarǵı baǵdarlarınan biri bolıp esaplanadı. Usı maqsette Ózbekstan Respublikası Ádillik ministrligi tárepinen usı jıldıń 10-iyuninen 31-iyuline shekem "Xızmetkerlerdiń miynet huqıqlarınıń kepilligi" atamasında respublika kóleminde huqıqıy úgit-násiyatlaw akciyası ótkerilmekte. Usı baslama sheńberinde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında huqıqıy-aǵartıwshılıq ushırasıwı shólkemlestirildi. Ilajda filial basshıları, professor-oqıtıwshılar hám xızmetkerler qatnastı.

Ilajdı filialdıń oqıw isleri boyınsha direktor orınbasarı Q.Atanazarov ashıp berip, zamanagóy miynet qatnasıqlarında huqıqıy bilimlerdiń ornı sheksiz ekenligin atap ótti. Ushırasıwda Qaraqalpaqstan Respublikası Ádillik ministrliginiń sektor bas másláhátshisi B.Matjanova, Nókis qalası Ádillik bóliminiń bas yuriskonsulti M.Xojaxmetova hám usı bólim xızmetkeri O.Seytnazarov qatnasıp, tema boyınsha hár tárepleme maǵlıwmatlar berdi. Olar miynet shártnamaların dúziw, ózgertiw hám biykarlaw tártipleri, xızmetkerlerdiń sociallıq kepillikleri, miynet kelispewshiliklerin huqıqıy sheshiw sıyaqlı máselelerde nızamshılıqta belgilengen normalar haqqında túsinikler berdi.

Sonday-aq, ushırasıwda filial yuriskonsulti N.Kannazarova da qatnastı hám miynet huqıqları boyınsha ámeliy usınıslar menen ortaqlastı. Ilaj dawamında qatnasıwshılar ózlerin qızıqtırǵan sorawlar menen qánigelerge múrájat etip, tikkeley huqıqtanıwshılardan túsinikli hám tiykarlanǵan juwaplar alıw imkaniyatına iye boldı. Bul bolsa ilajdı eki tárepleme ashıqtan-ashıq sóylesiw túrinde shólkemlestiriwge xızmet etti. Bul huqıqıy ushırasıw xızmetkerlerdiń miynet huqıqların jáne de tereń túsiniwge hám óz huqıqların nızamlı jol menen qorǵawǵa bolǵan umtılısların kúsheytti.