SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Kóshpeli kitapxana" studentlerge ruwxıy baylıq inám etti

Búgin jaslardıń intellektuallıq potencialı, dúnyaqarası hám ruwxıy dúnyasın joqarılatıw hár qashanǵıdan da áhmiyetli máselege aylanǵan. Ásirese, kitapqa mehir oyatıw, onı turmıs tárizine aylandırıw jas áwladtı kámil insan etip tárbiyalawda áhmiyetli qural bolıp esaplanadı. Usı maqsette Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında "Áhmiyetli 90 kún" sheńberinde gezektegi ruwxıy-aǵartıwshılıq ilaj bolıp ótti. Ilaj filialdıń Málimleme-resurs orayı xızmetkerleriniń baslaması menen shólkemlestirildi hám ózine tán mazmunı, jańasha qatnası menen ajıralıp turdı.

Ilaj sheńberinde Qaraqalpaqstan Respublikası Málimleme-kitapxana orayınıń qánigeleri X.Atamuratova hám N.Eliwbaevalar tárepinen "Kóshpeli kitapxana" shólkemlestirildi. Bul joybarda filial student-jasları hár qıylı temalardaǵı kitaplar menen tanısıw, olardı oqıw ushın waqtınsha alıw, qánigeler menen pikir alısıw imkaniyatına iye boldı.

Ilajdı Jaslar máseleleri hám ruwxıy-aǵartıwshılıq isleri boyınsha direktor birinshi orınbasarı X.Abdijaliyev ashıp berdi. Ol óziniń shıǵıp sóylegen sózinde búgingi globallasıw dáwirinde jaslardıń ruwxıy immunitetin kúsheytiwde kitaptıń ornı sheksiz ekenin ayrıqsha atap ótti.

— Búgin kitap insandı pikirlewge, analizlewge, eń áhmiyetlisi, durıs jol tańlawǵa úyretedi. "Kóshpeli kitapxana" bolsa bilim hám aǵartıwshılıqtı hár qádemde jaslarımızǵa jetkeriwge xızmet etedi — dedi X.Abdijaliyev. Ilaj dawamında studentler ózleri qızıqtırǵan shıǵarmalardı tańlap, kitapxana qánigeleri menen sáwbetlesti, jańa kitaplar haqqında maǵlıwmat aldı. Ásirese, kórkem, tariyxıy hám zamanagóy ádebiyatlarǵa qızıǵıwshılıq joqarı boldı. Studentler bunday ilajlardıń turaqlı ótkeriliwi olardıń ruwxıy dúnyasın bayıtıwǵa xızmet etetuǵının bildirdi. Málimleme-resurs orayı xızmetkerleriniń aytıwınsha, bunday joybarlar arqalı tek ǵana kitapqumarlıq úgit-násiyatlanbaydı, al jaslar arasında óz-ara doslıq, unamlı ortalıq ta qáliplesedi. Ilaj sońında studentlerge úgit-násiyat-broshyuralar, usınıs etilgen shıǵarmalardıń dizimi tarqatıldı hám kitapqumarlıq estafetası járiyalandı. Sebebi, ullı oyshıllarımız "Kitap - eń sadıq dos" dep biykarǵa aytpaǵan. Nókis filialındaǵı "Kóshpeli kitapxana" bolsa bul haqıyqattı jáne bir márte ámelde dálilledi.