SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Shakarim universiteti wákilleri studentlerge sabaq shınıǵıwların alıp bardı

Xalıqaralıq ilimiy-akademiyalıq baylanıslardı bekkemlew búgingi bilimlendiriw sistemasınıń tiykarǵı baǵdarlarınan biri. Ásirese, qońsı mámleketler menen nátiyjeli hám mazmunlı birge islesiw baylanısları tek ǵana tájiriybe almasıw emes, al oqıw processin innovaciyalıq kózqaraslar menen bayıtıwǵa xızmet etedi. Usı orında, jaqında Qazaqstan Respublikasınıń Semey qalasında jaylasqan Shakarim universitetiniń oqıtıwshıları L.Gabdullina, PhD hám B.Jumagulov Samarqand mámleketlik veterinariya medicinası, sharwashılıq hám biotexnologiyalar universiteti Nókis filialına bardı. Sapar sheńberindegi dáslepki ushırasıw filial direktorı, professor A.Esimbetovtıń qatnasıwında bolıp ótti.

Qızǵın ruwxta bolıp ótken sóylesiw waqtında miymanlarǵa filial tariyxı, bar baǵdarlar, oqıw hám ilimiy processler, xalıqaralıq birge islesiw baylanısları haqqında tolıq maǵlıwmatlar berildi. Tárepler eki joqarı bilimlendiriw mákemesi arasında birge islesiw perspektivaların dodalap, akademiyalıq almasıw, qospa joybarlar hám ilimiy izlenisler boyınsha usınıslar bildirdi. Itibarlı tárepi, sapar sheńberinde miymanlar "Ekonomika hám gumanitar pánler" kafedrasınıń ekonomika baǵdarında oqıp atırǵan studentlerge lekciya sabaqların ótkerdi.

Sonıń ishinde. L.Gabdullina tárepinen ótkerilgen sabaǵı dawamında Qazaqstan hám Ózbekstan ekonomikasınıń házirgi jaǵdayı, olardıń óz-ara ekonomikalıq birge islesiwi, integraciya processleri hám regionallıq ekonomikalıq baylanıslar haqqında tolıq maǵlıwmat berildi.

Sonday-aq, miynet bazarı, eksport-import potencialı, sonday-aq, ekonomikalıq siyasattaǵı ulıwmalıq hám ayırmashılıqlar dodalandı. Studentler berilgen temalardı úlken qızıǵıwshılıq penen tıńlap, ózlerin qızıqtırǵan sorawlar menen belsene qatnastı.

Bul sapar sheńberindegi sabaqlar filialda bilimlendiriwdiń sapası hám xalıqaralıq tájiriybe almasıwdı bunnan bılay da rawajlandırıw jolında áhmiyetli qádemlerden biri boldı. Filial búgingi kúnde Qazaqstannıń abıraylı joqarı bilimlendiriw mákemeleri menen birge islesiw baylanısların bekkemlep, óz-ara tájiriybe almasıw, ilimiy-pedagogikalıq birge islesiw hám akademiyalıq integraciyanı keńeytiwge umtılmaqta.