SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Kitaptı tap " viktorinası: bilim, tapqırlıq hám kitapqumarlıq únlesligi

"Áhmiyetli 90 kún" joybarı sheńberinde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı Málimleme-resurs orayınıń baslaması menen student-jaslar arasında gezektegi qızıqlı hám bilimge bay ilaj - "Kitaptı tap" atamasında viktorina shólkemlestirildi.
Ilajdı Málimleme-resurs orayınıń baslıǵı Z.Erlepesova kiris sóz benen ashtı. Ol "Áhmiyetli 90 kún" joybarı sheńberinde kitapxana ortalıǵında ámelge asırılıp atırǵan ruwxıy-aǵartıwshılıq ilajlardıń jaslar sanasın bayıtıwdaǵı ornı haqqında toqtap ótti. Viktorina elektron tárizde, zamanagóy qatnas tiykarında ótkerildi. Qatnasıwshılarǵa monitor arqalı belgili kórkem shıǵarmalardıń muqabası yamasa ondaǵı tiykarǵı saxna sáwlelendirilgen súwretler kórsetildi. Studentler bolsa usı súwretlerge qarap, shıǵarmanıń atın durıs tabıwǵa háreket etti.
Ilaj processi janlı pikir-talaslarǵa, tapqırlıq hám operativ pikirlewge bay túrde ótti. Studentler tek ǵana kitaplar haqqındaǵı bilimlerin sınaqtan ótkerip qoymastan, al bir-biriniń pikirlerin de belsene túrde qollap-quwatladı. Ilaj juwmaǵında eń belsendi qatnasıwshı jeńimpaz dep tabılıp, Málimleme-resurs orayı tárepinen estelik kitabı sawǵası menen sıylıqlandı.
Bul ilaj studentler arasında kitap oqıwǵa bolǵan qızıǵıwshılıqtı jáne de arttırıwǵa, kitapxanadan belsene paydalanıwǵa hám óz-ara pikir alısıw mádeniyatın qáliplestiriwge xızmet etti.