SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Jańa áwlad qánigeleri dissertaciyaların tabıslı qorǵamaqta

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında magistrantlardıń pitkeriw dissertaciyaların qorǵaw procesiniń ekinshi kúni de joqarı dárejede shólkemlestirildi."Veterinariya medicinası hám farmakologiyası" kafedrasınıń eki baǵdarı - "Veterinariya mikrobiologiyası, virusologiyası, epizootologiyası, mikologiyası hám immunologiyası" hám "Haywanlardıń parazit hám juqpalı kesellikleri" boyınsha bilim alıp atırǵan 6 magistrant óz ilimiy jumısların tabıslı qorǵadı. Qorǵaw processlerinde qatnasıwshılardıń tema tańlawı, ilimiy qatnas, izertlew metodikası hám ámeliy nátiyjeleri komissiya aǵzaları tárepinen joqarı bahalandı.

Ásirese, Qaraqalpaqstan aymaǵında ushırasatuǵın parazit túrleriniń morfologiyalıq hám molekulyar-genetikalıq analizine baǵıshlanǵan jumıslar ámeliy áhmiyeti menen ajıralıp turdı. Solar qatarında magistrant J.Kushimmatov tómendegishe pikir bildirdi: - "Qaraqalpaqstan aymaǵında tarqalǵan jırtqısh haywanlar paraziti: Echinococcus granulosus túriniń morfologiyalıq ózgeshelikleri hám molekulyar-genetikalıq analizi" atamasındaǵı dissertaciyamdı ayrıqsha bahaǵa qorǵadım. Bul process dawamında tek teoriyalıq bilimlerimdi tereńlestirip qoymastan, al ámeliy kónlikpelerdi de iyeledim. Men ushın bul úlken tájiriybe hám juwapkershilikli qádemlerden biri boldı. Filial direktorı A.Esimbetov pitkeriwshilerge tómendegishe jaqsı tilek bildirdi:
"Sizler ilim, veterinariya medicinası hám jámiyet aldındaǵı juwapkershilikli jolǵa qádem qoyıp atırǵan jaslarsız. Óz ústińizde tınımsız izleniń, keleshekke isenimli umtılıń. Hár birińizge bekkem erk-ıqrar, jarqın jetiskenlikler hám aydın keleshek tileymen!"
Maǵlıwmat ornında, bıyılǵı oqıw jılı juwmaǵında Nókis filialında jámi 9 magistrant oqıwdı tabıslı juwmaqlamaqta.