SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Tayanısh doktoranttıń ilimiy izleniwlerine arnalǵan aprobaciya ótkerildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında tayanısh doktorantlardıń ilimiy izleniwlerin qollap-quwatlaw hám olardıń ilimiy potencialın keń jámiyetshilikke tanıstırıw maqsetinde gezektegi ilimiy aprobaciya bolıp ótti. Onda Veterinariya medicinası hám farmakologiyası kafedrasınıń "Haywanlar patologiyası, onkologiyası hám morfologiyası. Veterinariya akusherligi hám haywanlar reproduksiyası biotexnikası" qánigeligi boyınsha birinshi basqıshta bilim alıp atırǵan tayanısh doktorant N.Dauletbaev óziniń ilimiy izleniw nátiyjelerin usındı.

Ilimiy jumıs "Túyetawıqlardıń artqı ayaq bulshıq etleriniń sızıqlı ólshemleri hám awırlıqların ólshew jáne matematikalıq qayta islewden ótkeriw" temasına baǵıshlanǵan bolıp, aprobaciya dawamında jas izertlewshi túyetawıqlardıń dene dúzilisi, háreket mexanizmi hám bulshıq et massasınıń skeletke qatnası sıyaqlı áhmiyetli morfologiyalıq ózgesheliklerin ilimiy tiykarda sáwlelendirip berdi. Atap ótiliwinshe, túetawıqlarda bulshıq et massasınıń skelet massasına qatnası 2,2-2,4:1 di quraydı hám bul kórsetkish olardıń háreket funkciyası, ásirese artqı ayaqlarınıń biomexanikalıq áhmiyetin anıqlawda áhmiyetli ólshem esaplanadı. Aprobada túye tawıqlardıń artqı ayaq bulshıq etleriniń anatomiyalıq dúzilisi, hárekette qatnasıwı, olardıń sızıqlı ólshemleri hám salmaǵı boyınsha alıp barılǵan baqlawlar hám matematikalıq qayta islew nátiyjeleri keń jámiyechiliktiń itibarına usınıldı.

Jas izertlewshiniń prezentaciyası dawamında tawıq tárizliler klasına tiyisli qus túrlerinde ushırasatuǵın siyrek ushırasatuǵın buwın-muskul sisteması, olardıń terek shaqasında energiya jumsamay tura alıw qásiyeti, sonday-aq, ayaq buwınlarınıń hárekette muwapıqlastırılǵan jumısı sıyaqlı áhmiyetli temalar hár tárepleme tallandı. Ilimiy izertlewler veterinariya ilimleriniń kandidatı, professor R.M. Tashtemirov basshılıǵında alıp barılmaqta. Aprobatsiya juwmaǵında kafedra aǵzaları, taraw qánigeleri tárepinen izertlewlerdiń aktuallıǵı, ámeliy áhmiyeti hám ilimiy qatnaslar joqarı bahalandı. Bul aprobaciya N.Dauletbaevtıń ilimiy izleniw baǵdarındaǵı dáslepki úlgili shıǵıwı sıpatında tán alındı hám onıń keyingi ilimiy jumısı ushın bekkem tiykar jarattı.