SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Zamanagóy jaslar názerinde milliy kiyimler

"Áhmiyetli 90 kún" joybarı hám juma kúni múnásibeti menen járiyalanǵan "Milliy kiyimler kúni" sheńberinde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında milliy kiyimler seyili ótkerildi.
Ilaj dawamında student-qızlar - hár qıylı milletke tiyisli, qaraqalpaq, qazaq hám rus xalıqlarınıń milliy kiyimlerinde filial aymaǵında seyil etip júrdi. Olar tek ǵana ózleriniń milliy lipasların kórsetip qoymastan, al bul arqalı óz-ara doslıq, milletleraralıq tatıwlıq hám mádeniy hár túrlilikti sáwlelendirdi.
Seyil sheńberinde "Veterinariya hám zooinjeneriya" fakulteti dekanı hayal-qızlar máseleleri boyınsha másláhátshisi N.Seytova tárepinen ashıq sáwbetlesiw shólkemlestirildi. Sáwbetlesiw dawamında ol milliy lipaslardıń tariyxıy tamırları, olardıń jaslar tárbiyasındaǵı ornı, estetikalıq hám mádeniy áhmiyeti haqqında hár tárepleme toqtap ótti.

— Milliy kiyim - bul tek ǵana kiyim emes, al ata-babalarımızdan miyras bolıp kiyatırǵan ruwxıy baylıq, milliy maqtanıshımız, mádeniyatımızdıń áhmiyetli elementlerinen biri. Bunday ilajlar jaslarda ózlikti ańlaw, milliy qádiriyatlardı qádirlew sezimin kúsheytedi— dep atap ótti N.Seytova.

Ilaj juwmaǵında student-qızlardıń kiyimleri arasında eń milliy, zamanagóy hám kórkem talǵam menen úylesken kórinisler ayrıqsha atap ótildi. "Áhmiyetli 90 kún" joybarı sheńberindegi bunday ilajlar filialda salamat, dóretiwshilik hám ruwxıy ortalıqtı qáliplestiriwge, jaslardıń bos waqıtların mazmunlı shólkemlestiriwge xızmet etpekte.