SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Jurnalistler ushın tájiriybe arttırıw treningi tabıslı ótti

Málimleme aǵımları barǵan sayın kúsheyip, jalǵan xabarlar jámiyettiń sanasına basım ótkerip atırǵan bir waqıtta, jurnalistikanıń juwapkershiligi hám júgi de artıp barmaqta. Nókis qalasında bolıp ótken eki kúnlik oqıw-trening áne usı áhmiyetli temalardı dodalawǵa baǵıshlandı. Bul trening Ózbekstan Respublikası Prezidenti Administraciyası janındaǵı Málimleme hám ǵalaba kommunikaciyalar agentligi hám Zamanagóy jurnalistikani rawajlandırıw orayı menen birgelikte shólkemlestirildi.

"Sanlı dáwir jurnalisti: qurallar, tekseriwler, manipulyaciyadan qorǵaw" atamasında ótken seminarda Qaraqalpaqstan Respublikası boylap jumıs alıp barıp atırǵan ǵalaba xabar qurallarınıń wákilleri, tájiriybeli jurnalistler, túrli shólkemler hám joqarı oqıw orınlarınıń málimleme xızmetleriniń basshıları qatnastı. Olar qatarında Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı Málimleme xızmetiniń baslıǵı Z.Xojamuratova da treningte belsene qatnastı.

Ol seminar dawamında áhmiyetli temalar boyınsha pikir almastı hám óz tájiriybesi menen ortaqlastı. Ilaj dawamında Tashkentten kelgen jetik jurnalistler hám media qánigeleri qatnasıwshılarǵa zamanagóy jurnalistika, media sawatlılıq, fakt-cheking, jalǵan xabarlardı anıqlaw sıyaqlı baǵdarlarda tereń bilim hám ámeliy kónlikpelerdi usındı. Álbette, treningtiń eń áhmiyetli táreplerinen biri jasalma intellekt qurallarınıń jurnalistikadaǵı ornı, olardıń imkaniyatları hám itimallı qáwip-qáterleri haqqındaǵı dodalawlar bolıp esaplanadı.

Eki kún dawam etken bul trening málimleme tarawında jumıs alıp barıp atırǵan hár bir jurnalist hám baspasóz xızmetkeri ushın jańasha qatnaslar, jańasha pikir, doslıq baylanıslar hám ilham baǵıshladı. Ilaj sońında barlıq qatnasıwshılarǵa arnawlı sertifikatlar saltanatlı túrde tapsırıldı. Bul bolsa olardıń kásiplik jolında jáne bir áhmiyetli basqıshtı basıp ótkeninen dárek berip, olarǵa jańa motivaciya baǵıshladı.