SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Ata-analar qatnasıwındaǵı ashıq sóylesiw: jetiskenlikler sıylıqlandı, birge islesiw bekkemlendi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında studentlerdiń ata-anaları qatnasıwında ashıqtan-ashıq sóylesiw tárizindegi ushırasıw bolıp ótti. Ilajda barlıq kurslarda oqıp atırǵan studentlerimizdiń ata-anaları rayon hám wálayatlardan kelip, belsene qatnastı.
Ilaj sheńberinde, aldı menen, filialda "Eń áhmiyetli basqısh" súreni astında shólkemlestirilgen sport jarısları hám ruwxıy-aǵartıwshılıq tańlawlarda jeńimpaz bolǵan student-jaslardı sıylıqlaw máresimi bolıp ótti. Jeńimpazlarǵa diplomlar, vaucherler hám aqshalay sıylıqlar saltanatlı túrde tapsırıldı. Ásirese, ata-analardıń gúwalıǵında bolıp ótken sıylıqlaw máresimi studentler ushın maqtanısh hám ilham dáregine aylandı.
Ilajdı ashıp bergen filial direktorı A.Esimbetov óz sózinde tómendegilerdi atap ótti: —Perzentlerińizge bildirgen isenimińiz ushın bársheńizge tereń minnetdarshılıq bildiremen. Jelkemizde áne usı isenim júgin kóterip, perzentlerińizge sapalı bilim beriw jolında bar kúsh hám ǵayratımızdı jumsaymız. Bunday ashıq-aydın sóylesiwler bizdi jáne de jaqınlastıradı hám tálim-tárbiya processine unamlı tásir kórsetedi.
Bunnan soń ata-analar toparlarǵa bólinip, kurslar kesiminde filial basshıları, professor-oqıtıwshılar menen tikkeley sáwbetlesti. Májilislerde ata-analarǵa bilimlendiriw processi, ishki tártip-qaǵıydalar, studentlerdiń jasaw hám oqıw sharayatı, bos waqıtların nátiyjeli shólkemlestiriw boyınsha tolıq maǵlıwmatlar berildi.

Bul ushırasıw ata-analar menen turaqlı baylanıslardı bekkemlew, olardı tálim-tárbiya processiniń belsendi qatnasıwshısına aylandırıw, perzentlerdiń tabıslı bolıwında hám shańaraq, hám joqarı bilimlendiriw mákemesiniń juwapkershilikli birge islesiwshisi ekenin ańlatıw maqsetinde shólkemlestirildi.
Májilis dawamında qábiletli hám belsendiligi menen ajıralıp turǵan studentlerdiń ata-analarına filial basshıları tárepinen minnetdarshılıq jarlıqları tapsırıldı.
—Men Nókiske Qaraózek rayonınan keldim. Qızımnıń belsendi, umtılıwshań hám intalı student sıpatında tán alınǵanı, maǵan bildirgen minnetdarshılıǵı qálbimdi maqtanıshqa toltırdı. Bunday ilajlar ata-analardı da perzentleriniń turmısına tikkeley tartadı, — deydi 3-kurs studenti Bibinur Bazarbaevanıń, anası Gulzar Aliyeva.
Álbette, bunday sóylesiwler ata-analar, oqıw ornı hám studentler arasındaǵı isenimdi jáne de bekkemleydi, bilimlendiriwdiń sapasın arttırıwǵa xızmet etedi.