SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Deputat hám jaslar: isenim sóylesiwden baslanadı

Jaslar - búgingi kúnniń intaker kúshi, erteńgi kúnniń tayanıshı. Olarǵa isenim bildiriw, mashqalaların tıńlaw, ideya hám baslamaların qollap-quwatlaw - bul búgingi mámleketlik siyasattıń tiykarǵı baǵdarı bolıp esaplanadı. Usı maqsette Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında "Deputat hám jaslar" atamasında ashıqtan-ashıq sóylesiw bolıp ótti. Ilajda Xalıq deputatları Shımbay rayonlıq Keńesiniń deputatı X.Abdijaliyev, Ózbekstan Ekologiyalıq partiyası Qaraqalpaqstan Respublikası partiya shólkemi Atqarıw komitetiniń baslıǵı A.Begimova, sonday-aq, filial basshıları, professor-oqıtıwshılar hám belsendi student-jaslar qatnasıp, ashıq hám qızǵın pikirlesti.

Bul ushırasıw tek ǵana soraw-juwap túrindegi ilaj emes, al jaslarǵa bolǵan tereń itibardıń, olardıń keleshegine bildirilip atırǵan isenimniń kórinisi boldı. Ushırasıw dawamında jaslarǵa jaratılıp atırǵan sharayatlar, bilimlendiriw, kásip-óner úyreniw, isbilermenlik, innovaciyalıq jumıs hám jaslardıń bántligin támiyinlew baǵdarında alıp barılıp atırǵan mámleketlik siyasat haqqında hár tárepleme maǵlıwmatlar berildi. Ásirese, jaslardıń huqıqıy sanasın qáliplestiriw, olardı siyasiy-jámiyetlik turmısta belsene qatnasıwǵa iytermelew máseleleri dodalaw orayında boldı. Deputatlar jaslar menen júzbe-júz sóylesip, olar tárepinen kóterilgen máselelerdi dıqqat penen tıńladı.

Sorawlarǵa tiykarlanǵan hám ashıq juwaplar berildi. Ásirese, jaslardıń parlament jumısındaǵı qatnası, saylawdaǵı ornı, nızamshılıq baslamaları menen shıǵıw huqıqı haqqında berilgen túsinikler olardıń siyasiy bilimlerin jáne de arttırdı. Ilaj dawamında studentler sociallıq ortalıq, bilimlendiriw processi, stipendiya sisteması, jumıs penen támiyinlew hám basqa da áhmiyetli máseleler boyınsha deputatlarǵa sorawlar menen múrájat etti. Hár bir soraw biypárwa qalmadı - hár bir mashqala tıńlandı, dodalandı hám ilajı bolǵanınsha ámeliy usınıslar berildi.

Jaslardıń belsendiligi, sociallıq processlerge biypárwa emesligi, óz keleshegine juwapkershilik penen qatnas jasap atırǵanı quwanıshlı jaǵday sıpatında tán alındı.

Álbette, bunday sóylesiwler jaslarda puqaralıq poziciyasın qáliplestiriw, olardı jámiyettegi óz ornın ańlawǵa shaqırıw, sociallıq belsendiligin kúsheytiw jáne mámleket hám jámiyet aldındaǵı juwapkershiligin seziwge xızmet etedi.
Ilaj sońında studentler bunday ashıq pikirlesiwler turaqlı shólkemlestiriliwi kerek ekenligin atap ótip, xalıq wákillerine minnetdarshılıq bildirdi.