SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filial imkaniyatları orınlarda úgit-násiyatlanbaqta

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında 2025-2026-oqıw jılı ushın abiturientlerdi qabıllaw processin sistemalı, nátiyjeli hám maqsetli jolǵa qoyıw maqsetinde keń kólemli úgit-násiyatlaw jumısları baslandı. Usı múnásibet penen shólkemlestirilgen arnawlı úgit-násiyatlaw toparları házirgi waqıtta orınlardaǵı ulıwma bilim beriw mákemelerine barıp, qabıllaw processleri, bilimlendiriw baǵdarları hám jaratılǵan imkaniyatlar boyınsha maǵlıwmat bermekte.

Usı úgit-násiyatlaw ilajları sheńberinde filial wákilleri - Jaslar máseleleri hám ruwxıy-aǵartıwshılıq isleri boyınsha direktor orınbasarı X.Abdijaliyev, Málimleme xızmeti baslıǵı Z.Xojamuratova hám "Zooinjeneriya" kafedrası oqıtıwshısı B.Alımbaevlar Qaraqalpaqstan Respublikasınıń Shımbay rayonındaǵı bir qatar mekteplerge bardı.
Atap aytqanda, 49-sanlı ulıwma bilim beriw mektebinde rayon kólemindegi mektep direktorların tartqan halda ashıq ushırasıw shólkemlestirildi. Ilajda oqıwshılar menen bir qatarda mektep basshıları menen óz aldına pikirlesiw ótkerilip, olar arqalı filialdıń oqıw-tárbiya processleri, bar baǵdarlar, studentler ushın jaratılǵan sharayatlar, materiallıq-texnikalıq baza haqqında tolıq hám isenimli maǵlıwmatlar jetkerildi. Úgit-násiyatlaw toparınıń shıǵıp sóylewlerinde filialda bilim alıp atırǵan studentler ushın jaratılǵan zamanagóy infrastruktura, jataqxana, kitapxana, laboratoriyalar, sport zalları hám bos waqıttı mazmunlı ótkeriw imkaniyatları ayrıqsha atap ótildi.

X.Abdijaliyev óziniń shıǵıp sóylegen sózinde filialda tek ǵana kásiplik bilim emes, al ruwxıy-ádep-ikramlılıq tárbiya, erkin pikirleytuǵın hám sociallıq belsendilikke iye jaslar tárbiyalanıp atırǵanına toqtap ótti.
Mektep direktorlarına berilgen bul maǵlıwmatlar olardıń pitkeriwshi oqıwshılarǵa kásip tańlawda durıs baǵdar beriwine xızmet etetuǵını, sol arqalı universitet hám mektepler arasındaǵı tıǵız birge islesiw bekkemlenetuǵını ayrıqsha atap ótildi. Ilaj dawamında filial jumısı sáwlelendirilgen videorolik kórsetildi, úgit-násiyatlaw materialları tarqatıldı hám oqıwshılardıń qızıqtırǵan sorawlarına juwaplar berildi.

Bul sapar etiwler arqalı mektep basshıları menen nátiyjeli sóylesiw ornatılıp, pitkeriwshilerdiń kásiplik keleshegin sanalı tańlawına járdemlesiw, olardı joqarı bilimlendiriwge baǵdarlaw baǵdarında áhmiyetli qádemler taslanbaqta. Sonıń menen birge, mektepler menen turaqlı baylanıslardı jolǵa qoyıw arqalı bilimlendiriwdegi úzliksizlikti támiyinlewge ayrıqsha itibar qaratılmaqta.