SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Ashıqtan-ashıq sóylesiw arqalı studentler ámeliyatın jáne de jetilistiriw dodalandı

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında oqıw jılı dawamında student-jaslardıń ámeliyat ótew processlerin nátiyjeli shólkemlestiriw máselelerine baǵıshlanǵan ashıqtan-ashıq sóylesiw bolıp ótti. Ilajda filial professor-oqıtıwshıları, oqıw-metodikalıq basqarma hám studentler ámeliyatı bólimi juwapkerleri, sonday-aq, belsendi student-jaslar qatnastı.

Ashıqtan-ashıq sóylesiwdi oqıw isleri boyınsha direktor orınbasarı Q.Atnazarov kiris sóz benen ashtı hám alıp bardı. Sáwbetlesiw dawamında ámeliyat processiniń mazmunı, onıń sapalı shólkemlestiriliwi, studentlerdiń teoriyalıq bilimlerin ámeliy kónlikpege aylandırıwdaǵı áhmiyetli basqıshlar, sonday-aq, birge islesiwshi shólkemler menen óz-ara baylanıslar máseleleri hár tárepleme dodalandı. "Veterinariya hám zooinjeneriya" fakulteti dekanı A.Kaniyazov hám oqıw-metodikalıq basqarması studentler ámeliyatı bólimi baslıǵı J.Ibragimov shıǵıp sóylep, filialdaǵı bar imkaniyatlar, ámeliyatqa baǵdarlanǵan kózqaraslar hám sheshimin kútip atırǵan mashqalalar haqqında óz pikir-usınısların bildirdi.

Ushırasıw ashıq hám interaktiv ruwxta ótti. Student-jaslar da belsene qatnasıp, ózlerin qızıqtırǵan sorawlar menen múrájat etti, usınıs hám pikir-usınısların bildirdi.
Ásirese, ámeliyat ótkeriw orınların tańlawda ashıq-aydınlıq, bahalaw normaları, ámeliyat dawamında qadaǵalaw sisteması hám nátiyjelilik boyınsha bildirilgen pikirler ayrıqsha áhmiyetke iye boldı. Bul ashıqtan-ashıq sóylesiw studentlerdiń kásiplik tayarlıǵın arttırıw, olardı tarawǵa jáne de tereńirek tartıw hám ámeliyat processin jetilistiriwge xızmet etetuǵın áhmiyetli platforma boldı.

Ilaj juwmaǵında alǵa qoyılǵan usınıslar tiykarında tiyisli ilajlar belgilendi. Nókis filialınıń basshılıǵı student-jaslardıń ámeliyatqa bolǵan qatnasın jáne de kúsheytiw, olardıń bilim hám kónlikpelerin real jumıs processinde bekkemlewge turaqlı itibar qaratıp atırǵanın ayrıqsha atap ótiw kerek.