SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Mektep oqıwshılarına filialda jaratılǵan imkaniyatlar jetkizlmekte

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında 2025-2026-oqıw jılı ushın abiturientlerdi qabıllaw procesin sistemalı hám nátiyjeli shólkemlestiriw maqsetinde úgit-násiyat jumısları baslap jiberildi. Bul process sheńberinde úgit-násiyatlaw toparları qáliplestirilip, orınlarda jumıs alıp barmaqta.
Jaqında filialdıń úgit-násiyatlaw toparı aǵzaları - Jaslar máseleleri hám ruwxıy-aǵartıwshılıq isleri boyınsha direktor orınbasarı X.Abdijaliyev, Málimleme xızmeti basshısı Z.Xojamuratova hám "Zooinjeneriya" kafedrası oqıtıwshısı B.Alimbaevlar tárepinen Qaraqalpaqstan Respublikasınıń Shımbay rayonında jaylasqan bir qatar ulıwma bilim beriw mekteplerine saparlar shólkemlestirildi.

Atap aytqanda, 32, 36, 38 hám 49-sanlı mekteplerde oqıwshı jaslar hám mektep administraciyası menen ashıq pikirlesiwler shólkemlestirildi. Sáwbetlesiw dawamında Nókis filialında bilim alıp atırǵan studentler ushın jaratılǵan keń imkaniyatlar, zamanagóy infrastruktura, tájiriybeli professor-oqıtıwshılar quramı, zamanagóy laboratoriyalar hám studentler turaq jayları haqqında hár tárepleme maǵlıwmatlar berildi.
Úgit-násiyat ushırasıwlarınıń tiykarǵı maqseti - jaslarǵa durıs hám anıq maǵlıwmat jetkeriw, olarda veterinariya, sharwashılıq hám biotexnologiyalar tarawlarına bolǵan qızıǵıwshılıǵın arttırıw jáne usı tarawǵa baǵdarlanǵan qánigelikler boyınsha bilim alıw tilegin kúsheytiwden ibarat. Sonı ayrıqsha atap ótiw kerek, Nókis filialında oqıw procesi búgingi kún talaplarına beyimlestirilgen bolıp, oqıw baǵdarlamaları hám ámeliy sabaqlar arqalı studentler teoriyalıq bilim menen bir qatarda ámeliy kónlikpelerdi de iyelep barmaqta.

Bunnan tısqarı, filialda jumıs alıp barıp atırǵan Jaslar awqamı, "Ruwxıylıq hám aǵartıwshılıq" orayı, sport dógerekleri hám kóplegen sociallıq joybarlar student-jaslardıń bos waqıtların mazmunlı shólkemlestiriw, olardı salamat turmıs tárizine baǵdarlawda áhmiyetli orın iyelemekte. Sonday-aq, ushırasıw dawamında oqıwshılarǵa filial jumısın sáwlelendiriwshi úgit-násiyatlaw materialları, buklet hám flayerler tarqatıldı. Bilimlendiriw baǵdarları, qabıllaw procesi, pánler kompleksi hám jaratılǵan sharayatlar haqqında túsinikli hám tolıq maǵlıwmatlar jámlengen bul materiallar abituriyentlerde úlken qızıǵıwshılıq oyattı.
Bunnan tısqarı, mektep oqıwshılarına filial turmısın sáwlelendiriwshi videorolikler kórsetildi. Usı videokórinisler arqalı olar universitette alıp barılıp atırǵan oqıw procesi, ilimiy hám ámeliy sabaqlar, studentlerdiń qatnasıwındaǵı sociallıq-mádeniy ilajlar menen jaqınnan tanısıw imkaniyatına iye boldı.
Úgit-násiyatlaw toparınıń keyingi mánzilleri Qaraqalpaqstan Respublikasınıń basqa da rayon hám qalaları bolıp, keleshekte bunday ushırasıwlardı jáne de keń kólemde dawam ettiriw rejelestirilgen.
Bul baslama jas áwladtıń keleshegin sanalı túrde tańlawına, sonday-aq, Nókis filialınıń regiondaǵı abırayın arttırıwǵa xızmet etetuǵını sózsiz.