SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Nókis filialınıń xalıq aralıq minberdegi hawazı: Urumchidaǵı prezentaciya hám birge islesiwler

Búgingi globallasıw dáwirinde joqarı bilimlendiriw mákemeleri tek bilim beriwshi emes, al jámiyettiń rawajlanıwınıń strategiyalıq drayverlerine aylanıp barmaqta. Ásirese, ilim, innovaciyalar hám sanlı texnologiyalar integraciyası arqalı turaqlı rawajlanıwǵa erisiw áhmiyetli wazıypaǵa aylanǵan. Usı kózqarastan, xalıqaralıq birge islesiwdi bekkemlew, aldıńǵı tájiriybe hám ideyalar almasıw zamanagóy bilimlendiriw sistemasınıń ajıralmas bólegi bolıp esaplanadı.
2025-jıl 13-may kúni Qıtay Xalıq Respublikasınıń Urumchi qalasında jaylasqan Sinjon Awıl xojalıǵı universitetinde shólkemlestirilgen xalıqaralıq konferenciya hám seminar mine usınday áhmiyetli máselelerge baǵıshlandı. "Qıtay hám Oraylıq Aziya mámleketleri arasında sanaat, joqarı bilimlendiriw, ilimiy izertlewler hám texnologiyalardı ámeliyatqa engiziwde birge islesiw" atamasında ótkerilgen konferenciyanıń áhmiyetli quram bólegine aylanǵan "Sanlı talantlardı tayarlaw hám jańa sapa ónimdarlıǵı, awıl xojalıǵında jasıl innovaciyalar hám turaqlı rawajlanıw" atamasındaǵı xalıqaralıq seminar regionallıq ilimiy baylanıslardıń jańa basqıshın baslap berdi.
Seminarda Ózbekstan delegaciyası quramında belsene qatnasqan Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı delegaciyası, filial direktorı professor A.Esimbetov basshılıǵında, mákemeniń xalıqaralıq kólemdegi jumısı, ilimiy potencialı hám perspektivalı birge islesiw baǵdarları boyınsha prezentaciya ótkerdi. Ilaj dawamında bir neshe iri ilimiy oraylar menen perspektivalı sóylesiwler alıp barıldı. Seminar dawamında Nókis filialınıń ilimiy potencialı hám xalıqaralıq baǵdardaǵı prezentaciyası qatnasıwshılarda qızıǵıwshılıq oyattı. Ásirese, taraw boyınsha jetekshi sırt el joqarı bilimlendiriw mákemeleri - Qıtaydıń Xinjan agrar universiteti hám QS World University Rankings 2025 reytinginde óz ornına iye bolǵan Qazaqstannıń Sáken Seyfullin atındaǵı agrotexnika izertlew universiteti tárepinen filial menen tıǵız birge islesiw tilegin bildirdi hám akademiyalıq birge islesiwdi jolǵa qoyıw boyınsha baslamalar alǵa qoyıldı.

Tárepler professor-oqıtıwshılardıń mamanlıǵın arttırıw, studentler almasıw baǵdarlamaların rawajlandırıw, birgeliktegi ilimiy joybarlardı ámelge asırıw hám innovaciyalıq izleniwlerde sheriklikti jolǵa qoyıw boyınsha perspektivalı baǵdarlardı dodaladı. Bunday kózqaraslar Nókis filialınıń tek ǵana milliy emes, al xalıqaralıq kólemde de tán alınıwına, bilimlendiriw hám ilim tarawında isenimli sherik sıpatında qaralıwına tiykar bolmaqta. Bul bolsa, óz gezeginde, filialdıń xalıqaralıq ilimiy-akademiyalıq maydandaǵı abırayı artıp atırǵanınan dárek beredi.

Sapar sheńberindegi ushırasıw hám kelisimler Nókis filialınıń xalıqaralıq bilimlendiriw hám ilimiy jámiyetshiliktegi abırayın bekkemlew, ilimiy almasıwlar hám akademiyalıq integraciyanı tereńlestiriwde áhmiyetli basqısh boldı.

Ásirese, turaqlı rawajlanıw hám jasıl texnologiyalar tiykarında awıl xojalıǵın modernizaciyalaw boyınsha aldıńǵı ideyalar hám kózqaraslardıń almasıwı - ánjuman nátiyjeleriniń eń áhmiyetli táreplerinen biri boldı. Xalıqaralıq birge islesiw hám innovaciyalıq baslamalardıń keńeyiwi - Ózbekstannıń bilimlendiriw strategiyasındaǵı tiykarǵı baǵdarlardan biri bolıp, bul jolda Nókis filialınıń belsene qatnasıwı quwanıshlı hám perspektivalı nátiyje bolıp tabıladı.