SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qálem hám súwret arqalı jaqsı ideyalar

Jas áwladtıń dúnyaǵa kózqarası, dóretiwshilik potencialı hám salamat turmısqa bolǵan umtılısı Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında ótkerilip atırǵan hár qıylı mádeniy-aǵartıwshılıq hám sport ilajlarında ayqın kózge taslanbaqta. Aprel-may aylarında "Eń áhmiyetli basqısh" súreni astında shólkemlestirilgen joybarlar sheńberinde ótkerilgen súwretler tańlawı da studentler arasında úlken qızıǵıwshılıq oyattı. "Ózbekstan keleshegi jaslar názerinde," "Milletleraralıq tatıwlıq" hám "Kásibim - maqtanıshım" sıyaqlı temalar tiykarında dóretiwshilik qollanbalar usınılıp, qatnasıwshılar óz kózqarasları, ideyaları hám ishki dúnyasın kórkem súwretlewge háreket etti.
Nátiyjelerge bola, 3-kurs 309-topar studenti G.Qudaybergenova birinshi orınǵa múnásip dep tabıldı. Onnan keyingi orınlardı, yaǵnıy ekinshi orındı 1-kurs 109-topar studenti B.Orınbaeva hám úshinshi orındı 3-kurs 306-topar studenti A.Xamidullaev iyeledi.

Bunday tańlawlar arqalı studentlerde intakerlik, sociallıq belsendilik hám kórkem talǵam joqarılap, olar ómirge ózine tán kózqaras penen qarawdı úyrenbekte. Mazmunı bay, ideyalıq jaqtan tereń bunday ilajlar jaslardıń kewlinde jaqsı sezimlerdi oyatadı, olarǵa óz potencialın ashıw, jámiyettegi ornın ańlaw hám óz jolın tabıwda bekkem tiykar jaratadı.
Studentlerdiń hár bir qatnasıwı - bul keleshekke taslanǵan isenimli qádem, olardıń hár bir dóretiwshilik jumısı bolsa - Watan rawajlanıwı jolında janıp jasap atırǵan júrek dawısı bolıp esaplanadı.