SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Milliy qádiriyatlar seyili" - jaslar qálbine mánawiyat hám watanǵa sadıqlıq sezimin oyatpaqta

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında "Ádebiy-aǵartıwshılıq háptelikler" sheńberinde "Milliy qádiriyatlar seyili" atamasında mádeniy-aǵartıwshılıq ilajı bolıp ótti. Ilajdı "Veterinariya hám zooinjeneriya" fakulteti dekanı A.Kaniyazov ashıp berdi hám jaslar tárbiyasında bul sıyaqlı baslamalardıń ornı hám áhmiyetine toqtap ótti.

Ilaj dawamında filial student-jasları tárepinen saxnalastırılǵan kórkem shıǵıwlar kórsetildi. Olar ózleriniń dóretiwshilik shıǵıwlarında xalqımızdıń bay mádeniy miyrası hám milliy úrp-ádetlerin janlı túrde sáwlelendirdi. Sonıń ishinde, xalıq dástúrleri tiykarında saxnalastırılǵan "Bet ashar" kórinisi tamashagóyler tárepinen úlken qızıǵıwshılıq hám alǵıslar menen kútip alındı.

Sonday-aq, qábiletli studentler atqarıwında elimizdi, ana tilimizdi, milliy qádiriyatlarımızdı jırlaytuǵın qosıqlar jańladı, nama-qosıqlar atqarıldı. Ilaj sheńberinde milliylikti jáne de tereń ańlatıw maqsetinde milliy sport jarısları da shólkemlestirildi. Bellesiwler dawamında ádil ótiwin támiyinlew maqsetinde tóreshilik wazıypasın Jaslar menen islesiw boyınsha dekan orınbasarı E.Seytmuratov hám "Ekonomika hám gumanitar pánler" kafedrası oqıtıwshısı Q.Urazbaev alıp bardı. Student-jaslar toparlarǵa bólingen halda milliy sport oyınlarında, sonıń ishinde, arqan tartıw, tas kóteriw hám turnikke tartılıw sıyaqlı bellesiwlerde belsene qatnastı.

Jarıs juwmaqlarına bola, 3-kurs 306-topar studentleri 35 ball toplap, sıylı 1-orındı iyeledi. 2-orın 33 ball menen 3-kurs 304-topar komandasına nesip etti. 3-kurs 301-topar studentleri bolsa 31 ball menen 3-orındı iyeledi. Bunday ilajlar student-jaslar qálbinde milliy qádiriyatlarǵa bolǵan mehir hám maqtanısh sezimlerin bekkemlewge xızmet etedi. Sonday-aq, olardı watansúyiwshilik, birlik hám ózligine sadıqlıq ruwxında tárbiyalaydı.