SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Studentler voleybolda bellesti

Student-jaslardıń fizikalıq belsendiligin arttırıw, olardı salamat turmıs tárizine baǵdarlaw hám sport arqalı sociallıq belsendiligin kúsheytiw maqsetinde filialda jáne bir áhmiyetli sport jarısı óz juwmaǵına jetti. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında ótkerilgen "Direktor kubogi" voleybol jarısı er balalar arasında úlken qızıǵıwshılıq hám bellesiwlerge bay túrde shólkemlestirildi.

Jarıs "Eń áhmiyetli basqısh" súreni astında ótkerilip atırǵan sport hám ruwxıy-aǵartıwshılıq ilajlar sheńberinde bolıp ótti hám jaslar arasında salamat báseki, jámiyetshilik hám jeńiske umtılıw sıyaqlı qádiriyatlardı bekkemlewge xızmet etti. Jarıs dawamında hár bir komanda jeńis ushın belsendilik kórsetip, sport maydanında shın mánisinde professional dárejede oyın kórsetti. Oyınlar qızıqlı hám tartıs, bellesiwlerge bay boldı, bul bolsa tamashagóylerde kúshli tásir qaldırdı.

Bellesiwler dawamında jarıstıń ashıq-aydın hám ádil ótiwin támiyinlew maqsetinde tóreshilik wazıypasın Jaslar menen islesiw boyınsha dekan orınbasarı E.Seytmuratov hám "Ekonomika hám gumanitar pánler" kafedrası oqıtıwshısı Q.Urazbaev alıp bardı. Jarıs nátiyjelerine bola:
1-orın - 303-topar komandasına,
2-orın - 301-topar komandasına,
3-orın - 402- topar komandasına nesip etti.
Juwmaqlaw máresiminde jeńimpazlar shólkemlestiriwshiler tárepinen diplom hám estelik sawǵaları menen sıylıqlanadı. Eń áhmiyetlisi, bunday ilajlar studentlerde salamat báseki ortalıǵın qáliplestiriw, bos waqıtların mazmunlı ótkeriw hám sport arqalı ózin kórsetiw imkaniyatın jaratpaqta. "Direktor kubogi" jarısı - bul tek ǵana sport emes, al bir komanda bolıp háreket etiw, strategiyalıq pikirlew hám jeńiske umtılıw ruwxı tárbiyalanatuǵın áhmiyetli platforma bolıp esaplanadı. Jarıs arqalı qatnasıwshılar tek ǵana fizikalıq emes, al ruwxıy jaqtan da óz ústinde islew zárúrligin sezdi.