SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qazaqstanlı professor qatnasıwında online lekciya shólkemlestirildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında xalıqaralıq ilimiy birge islesiw sheńberinde gezektegi áhmiyetli ilaj shólkemlestirildi. Qazaqstan Respublikası Shımkent qalası Muxtar Awezov atındaǵı Qubla Qazaqstan universitetiniń belgili ilimpazı, professor, akademik J.Pirjanov tárepinen "Qazaqstanda kóbeytiletuǵın qaramal násilleriniń ónimdarlıǵı" atamasında online bayanat oqıldı. Bul lekciya "Zooinjeneriya" kafedrasınıń pitkeriwshi basqısh studentleri ushın shólkemlestirilip, onda kafedranıń professor-oqıtıwshıları, ilimiy izleniwshiler hám sharwashılıq baǵdarında bilim alıp atırǵan qábiletli studentler belsene qatnastı.

Bayanatshı óziniń shıǵıp sóylegen sózinde Qazaqstanda qaramal násilin jetistiriw boyınsha alıp barılıp atırǵan selekciya jumısları, genetikalıq modellestiriw, násilshilikti jaqsılaw boyınsha qollanılıp atırǵan zamanagóy texnologiyalar haqqında tolıq maǵlıwmat berdi. Sonday-aq, sút hám gósh ónimdarlıǵı joqarı bolǵan násillerdiń abzallıqları, olardı tańlap alıw kriteriyaları hámde olardıń qorshaǵan ortalıq sharayatlarına beyimlesiwsheńligi boyınsha ilimiy tiykarlanǵan pikir-usınısların bildirdi. Bayanat qatnasıwshılarda úlken qızıǵıwshılıq oyatıp, olar ushın paydalı bilim hám jańa kózqaraslardı qáliplestiriwde áhmiyetli faktor boldı.

Bunday xalıqaralıq ilimiy ushırasıwlar tek ǵana studentlerdiń kásiplik potencialın arttırıw emes, al olardıń ilimiy kózqarasın keńeytiw, sırt el tájiriybesi menen jaqınnan tanısıw hám zamanagóy qatnaslardı úyreniw imkaniyatın beredi. Ilaj sońında filial basshıları tárepinen professor J.Pirjanovqa tereń minnetdarshılıq bildirilip, keleshekte de Qazaqstannıń joqarı oqıw orınları menen ilimiy-akademiyalıq baylanıslardı bunnan bılay da rawajlandırıw, qospa joybarlar, ilimiy konferenciyalar hám professor-oqıtıwshılar arasında tájiriybe almasıwlardı jolǵa qoyıw boyınsha anıq rejeler belgilep alındı.