SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Kúydirgi keselliginiń tarqalıwı hám onıń aldın alıw boyınsha oqıw-ámeliy seminar shólkemlestirildi

Qaraqalpaqstan Respublikası Ishki isler ministrligi Jámiyetlik qáwipsizlik xızmeti Jámiyetlik tártipti saqlaw basqarması Karantin ilajların támiyinlew toparı xızmetkerleri, Qaraqalpaqstan Respublikası Veterinariya hám sharwashılıqtı rawajlandırıw komiteti hám Ayrıqsha jaǵdaylar basqarması qánigeleri tárepinen Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında kúydirgi keselliginiń tarqalıw jaǵdaylarında háreket etiw hám keselliktiń aldın alıw boyınsha oqıw-ámeliy seminar shólkemlestirildi.
Ilajdı filial direktorı, A.Esimbetov ashıp berdi hám usı sıyaqlı oqıw shınıǵıwları jas qánigelerdiń kásiplik tayarlıǵın arttırıwda ayrıqsha áhmiyetke iye ekenligin atap ótti. Seminarǵa filial professor-oqıtıwshıları, veterinariya tarawındaǵı qánigeler hám student-jaslar belsene qatnastı.

Ilaj dawamında kúydirgi keselligi anıqlanǵan haywanlardı joq etiw tártibi ámeliy tárizde kórsetildi. Atap aytqanda, arnawlı tayarlanǵan sıyır maketin paydalanǵan halda haywandı órtew, zıyansızlandırıw hám qorshaǵan ortalıqtı dezinfekciyalaw boyınsha basqıshpa-basqısh kórsetpeler berildi.
Sonday-aq, adamlarda kúydirgi keselliginiń juǵıw sebepleri, klinikalıq belgileri, ótiwi hám profilaktikalıq ilajları haqqında hár tárepleme maǵlıwmatlar berildi. Seminar qatnasıwshıları epidemiyalıq jaǵdaylarda durıs hám operativ háreket etiw, kesellik anıqlanǵanda tezlik penen tiyisli shólkemlerge múrájat etiw, karantin ilajların engiziw hám zıyansızlandırıw tártipleri menen tanıstırıldı.
Bul oqıw-ámeliy seminar student-jaslardıń teoriyalıq bilimlerin ámeliy kónlikpeler menen bekkemlew, sonday-aq, juqpalı kesellikler tarqalıwınıń aldın alıw boyınsha zárúr tájiriybe arttırıwlarına xızmet etti.