SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Studentler qatnasıwında ayrıqsha jaǵdaylardıń aldın alıwǵa qaratılǵan profilaktikalıq ilaj ótkerildi

Usı jıldıń 6-may kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında student-jaslardıń ayrıqsha jaǵdaylar, atap aytqanda, jer silkiniw hám suw qáwipsizligi boyınsha bilim hám túsiniklerin arttırıwǵa qaratılǵan gezektegi profilaktikalıq ilaj shólkemlestirildi. Studentler qatnasıwında ayrıqsha jaǵdaylardıń aldın alıwǵa qaratılǵan profilaktikalıq ilaj ótkerildi. Ilajdı Jaslar máseleleri hám ruwxıy-aǵartıwshılıq isleri boyınsha direktor orınbasarı X.Abdijaliyev kiris sóz benen ashıp berip, bunday ushırasıwlar jaslardıń sergeklik, qáwipsizlik hám juwapkershilik baǵdarındaǵı mádeniyatın qáliplestiriwde áhmiyetli orın iyeleytuǵının atap ótti.
Ilajǵa Nókis qalası Ayrıqsha jaǵdaylar bólimi xızmetkeri, kapitan J.Toraev, filial profilaktika inspektorı, kapitan Q.Qayıpnazarov hám student-jaslar qatnastı. Qánigeler tárepinen berilgen maǵlıwmatlar hám turmıslıq tájiriybeler tiykarında studentler ózleri ushın áhmiyetli sabaqlar aldı.

Ilajda studentlerge jer silkiniw hádiysesiniń kelip shıǵıw sebepleri, onıń unamsız aqıbetleri, sonday-aq, bunday ayrıqsha jaǵdaylarǵa tayar turıw hám olardıń aqıbetlerin azaytıw boyınsha zárúr usınıslar berildi. Bunnan tısqarı, jaz máwsiminde áhmiyetli bolıp atırǵan suw basseynlerinde shomılıw qaǵıydaları boyınsha da hár tárepleme túsinikler berildi. "Suwǵa shomılıw qaǵıydası - ómir paydası" súreni astında ótken bul ushırasıwda, ásirese, qadaǵan etiwshi belgiler - "Qáwipli!," "Suwǵa shomılıw qadaǵan!," "Suwǵa súńgiw (sekiriw) qadaǵan!" sıyaqlı eskertiwshi jazıwlar ornatılǵan orınlarda suwǵa shomılıw hám sekiriwdiń unamsız jaǵdayları, olardıń aqıbetleri haqqında anıq faktler hám mısallar keltirildi.