SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Jas bioximikler" dógeregi sheńberinde kásiplik kónlikpeler qáliplestirilmekte

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında studentlerdiń bilimin ámeliyat penen bekkemlew, olardıń ilimiy kózqarasın hám kásiplik kónlikpelerin rawajlandırıwǵa ayrıqsha itibar qaratılmaqta. Atap aytqanda, "Veterinariya diagnostikası hám azıq-awqat qáwipsizligi" kafedrasınıń baslaması menen shólkemlestirilgen "Jas bioximikler dógeregi" sheńberinde turaqlı túrde sabaqlar ótkerilmekte. Dógerek jumısında kafedra oqıtıwshıları D.Bazarbaeva hám B.Muratbaevalar tárepinen áhmiyetli temalar tiykarında teoriyalıq hám ámeliy sabaqlar shólkemlestirilmekte. Atap aytqanda, D.Bazarbaeva tárepinen alıp barılǵan
"Preparatlardı Gram usılında boyaw" temasındaǵı laboratoriyalıq shınıǵıw dawamında studentler bakteriyalardı differencial boyaw texnikası, onıń mikrobiologiyalıq diagnozlawdaǵı ilimiy-ámeliy áhmiyeti hám mikroskoplıq tekseriwde ámelge asırılatuǵın tiykarǵı basqıshlar menen hár tárepleme tanıstı. Sonday-aq, B.Muratbaeva tárepinen ótkerilgen "Awıl xojalıǵı haywanlarınıń sidik shıǵarıw organları sisteması" atamasındaǵı ámeliy sabaǵı haywanlar fiziologiyası hám urogenital sistemasınıń dúzilisi hám funkcional ózgesheliklerin tereń talqılawǵa qaratıldı. Sabaq dawamında sidik shıǵarıw organlarınıń dúzilisi, wazıypaları, patologiyalıq jaǵdaylarda júzege keletuǵın ózgerisler hám olardı diagnostikalaw metodları boyınsha teoriyalıq hám ámeliy bilimler berildi.
Bul sabaqlar dógerek aǵzalarınıń biologiya, fiziologiya hám bioximiya pánlerine bolǵan qızıǵıwshılıǵın jáne de arttırıw, olardıń kásiplik baǵdarda bekkem bilim hám kónlikpelerge iye bolıwına xızmet etpekte. Dógerek jumısı dawamında studentler ámeliy laboratoriya jumısların ózlestirip ǵana qoymastan, al veterinariya diagnostikası tarawında nátiyjeli jumıs alıp barıw ushın zárúr bolǵan kónlikpelerdi rawajlandırdı. Bul shınıǵıwlar dógerek aǵzalarınıń kásiplik qızıǵıwshılıǵın kúsheytti hám olardı óz qánigelikleri boyınsha jáne de tereń bilim alıwǵa iytermeledi.