SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Chempionlar menen ushırasıw jaslardı ilhamlandırdı

Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında jaslardıń qálbinde sportqa mehir oyatıw, olarda jeńiske umtılıw, Watanǵa sadıqlıq hám salamat turmıs tárizin qáliplestiriw maqsetinde sportshı hám jaslar ushırasıwı bolıp ótti.
Bul ushırasıw sheńberinde sporttıń grek-rim gúresi túri boyınsha eki márte Aziya chempionı, Ózbekstan saylandı komandasınıń aǵzası J.Berdimuratov, onıń treneri R.Ernazarov, sonday-aq, qılıshpazlıq boyınsha Jáhán kubogınıń bronza medalı iyesi, Aziya kubogınıń jeńimpazı Sh.Mamutov miyman sıpatında qatnastı. Olar menen júzbe-júz sáwbet, jaslardıń qálbinde óshpes iz qaldırdı.

Ilajdı Jaslar máseleleri hám ruwxıy-aǵartıwshılıq isleri boyınsha direktor orınbasarı X.Abdijaliyev ashıp berip, búgingi kúnde sport tek ǵana fizikalıq kúshlilik emes, al erk-ıqrardıń shınıǵıwı, Watanǵa sadıqlıq hám óz ústinde islewdiń eń ayqın kórinisi ekenin atap ótip, sporttıń pidayılıq hám sabır-taqat mektebi ekeni haqqında sóz etti.
Sportshılar jaslar menen óz tájiriybeleri, jetiskenlikleri hám turmıslıq sabaqları menen ortaqlasıp, hár bir jetiskenlik artında miynet, erk-ıqrar hám Watanǵa sheksiz muhabbat jatırǵanın atap ótti. Olardıń qızǵın hám ilhamlandırıwshı sózleri student-jaslarda úlken tásir qaldırdı. Chempionlar jetiskenlikleri hám sınaqları, sport maydanındaǵı jeńisleri artında jatqan mashaqatlı miynet haqqında qızǵın sóz etti. Hár bir sóz, hár bir gúrriń jaslarımızǵa tek ǵana kúsh emes, al isenim, maqtanısh hám ilham baǵıshladı.

Bunday ushırasıwlar jas áwladtı salamat turmısqa jetekleydi, olardı iygilikli maqsetlerge shaqıradı. Sportqa bolǵan mehir hám qızıǵıwshılıqtı arttıradı, Watanǵa sadıqlıq, erk-ıqrarlı hám pidayı bolıwǵa shaqıradı. Eń tiykarǵısı, olar arzıw etiwden, ullı sheklerdi gózlewden qorıqpaw kerek ekenligin jáne bir márte dálilleydi.
Sebebi, búgingi jas sport ıqlasbentleri - erteńgi kúnniń chempionları, el-jurttıń maqtanıshı!