SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Xalıqaralıq tájiriybe - zamanagóy bilimlendiriw gilti: KOICA menen birge islesiw jolǵa qoyılmaqta

Zamanagóy bilimlendiriw processleri globallasıw basqıshına kirip barǵan házirgi sharayatta studentlerimizdiń tereń bilim hám keń dúnyaǵa kózqarasqa iye bolıwı tikkeley sırt el tájiriybesi hám aldınǵı metodikalardı ózinde jámlegen oqıw baǵdarlamalarına baylanıslı. Sırt el oqıtıwshıların bilimlendiriw sistemasına tartıw bolsa, tek ǵana bilim almasıwın támiyinlew emes, al oqıw processlerin jáhán talapları tiykarında jetilistiriwge xızmet etedi.
Usı maqsette, Koreya xalıqaralıq birge islesiw agentliginiń (KOICA) Ózbekstandaǵı wákilxanası wákilleri Samarqand mámleketlik veterinariya medicinası, sharwashılıq hám biotexnologiyalar universiteti Nókis filialına bardı. Sapar sheńberinde KOICA wákilleri - So Wan Su, Park Junhyung hám Rojiboev Ilhom filial basshıları, atap aytqanda, filial direktorı A.Esimbetov penen ushırasıw ótkerdi. Sóylesiw dawamında tárepler óz-ara birge islesiw perspektivaları, sırt elli qánigelerdi bilimlendiriw procesine volontyor sıpatında tartıw, aldıńǵı tájiriybe almasıw hám iri birgeliktegi joybarlardı ámelge asırıw máselelerin dodaladı.
Ushırasıw waqtında KOICA tárepinen Koreya Respublikasınan tájiriybeli oqıtıwshılardı bir jıl dawamında Nókis filialında sabaq ótiw ushın jiberiw, ilimiy hám ámeliy baǵdarlarda birgeliktegi baslamalardı jolǵa qoyıw boyınsha usınıslar bildirildi. Atap aytqanda, bilimlendiriwdiń sapasın arttırıwǵa qaratılǵan qollap-quwatlaw mexanizmleri hám infrastrukturalıq járdem kórsetiw imkaniyatları boyınsha pikir alısıldı. Sapar dawamında miymanlarǵa filialdıń tiykarǵı jumısı, bar bilimlendiriw processleri, laboratoriyalar hám oqıw xanalarınıń texnikalıq úskeneleniwi, studentlerdiń sanı hám olardıń jetiskenlikleri haqqında tolıq maǵlıwmatlar berildi. KOICA wákilleri filial aymaǵında jaratılǵan sharayatlar, zamanagóy oqıw xanaları hám laboratoriyalar menen jaqınnan tanıstı.
Eger bul baslama tabıslı ámelge asırılsa, Koreya Respublikasınan tájiriybeli oqıtıwshılar Nókis filialında jumıs alıp baradı hám studentlerdiń bilimin bekkemlewge úlken úles qosadı. Bul birge islesiwden kútilip atırǵan tiykarǵı nátiyje - bilimlendiriw procesin xalıqaralıq tájiriybege tiykarlanǵan halda bayıtıw, innovaciyalıq qatnaslardı engiziw hám studentlerge joqarı sapalı bilim beriwden ibarat.