SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Ekologiyalıq tarawdaǵı ilimiy-ámeliy birge islesiw perspektivaları dodalandı

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialına Qorshaǵan ortalıq hám tábiyattı qorǵaw texnologiyaları ilimiy-izertlew institutınıń wákilleri keldi.
Usı sapar sheńberinde instituttıń Jer resursların qorǵaw laboratoriyasınıń baslıǵı, PhD R.Madrimov, Biologiyalıq hár túrlilik laboratoriyasınıń baslıǵı M.Qurbanbaeva hám Jer resursların qorǵaw laboratoriyasınıń bólim baslıǵı X.Boboev filial direktorı A.Esimbetov penen ushırasıp, ekologiya baǵdarında ilimiy-izertlew hám innovaciyalıq jumıstı nátiyjeli shólkemlestiriw, qospa joybarlardı ámelge asırıw, ilimiy potencialdı arttırıwǵa qaratılǵan strategiyalıq birge islesiw perspektivaların dodaladı. Ushırasıw dawamında, sonday-aq, institut wákilleri tárepinen Moynaq rayonında ilimiy-izertlew jumısların alıp barıw ushın ajıratılǵan 10 gektar jer maydanı bar ekenligi atap ótildi.

Bul maydan ekologiyalıq monitoring, topıraq hám biologiyalıq hár túrlilik analizleri, shól zonasınıń degradaciyası hám onı tiklewge qaratılǵan ámeliy tájiriybeler ushın tábiyǵıy laboratoriya wazıypasın atqaradı. Tárepler bul aymaqta filialda bilim alıp atırǵan magistrantlar hám doktorantlardı tartqan halda, olardıń ilimiy-izertlew jumısları, ámeliy kónlikpeleri hám dala sharayatında erkin izleniw alıp barıw imkaniyatların keńeytiw baǵdarında óz-ara birge islesiwdi jolǵa qoyıwǵa kelisip aldı.
Bunday ilimiy-ámeliy baylanıslar zamanagóy ekologiyalıq mashqalalarǵa sheshim tabıwda jas ilimpazlardıń potencialınan nátiyjeli paydalanıw, fundamental hám qollanba ilimiy izertlewler alıp barıw imkaniyatın jaratadı.