Qaraqalpaqstan Respublikası Konstituciyası qabıl etilgeniniń 32 jıllıǵı menen qutlıqlaw
Húrmetli kásiplesler, áziz doslar!
Sizlerdi Qaraqalpaqstan Respublikası Konstituciyası qabıl etilgen kúnniń 32 jıllıǵı múnásibeti menen shın kewlimnen qutlıqlayman!
Konstituciya - hár bir mámlekettiń huqıqıy tayanıshı, ǵárezsizlik tımsalı hám xalıqtıń erkin erk-ıqrarın bildiretuǵın tiykarǵı hújjet. 1993-jıl 9-aprelde qabıl etilgen Qaraqalpaqstan Respublikası Konstituciyası da áne usınday tariyxıy áhmiyetke iye bolıp, ótken 32 jıl dawamında elimizdiń rawajlanıwı, xalqımızdıń abadan turmısı hám turaqlı rawajlanıwın támiyinlewde áhmiyetli orın iyelep kelmekte.
Konstituciyamız xalıqtıń siyasiy, ekonomikalıq, sociallıq hám mádeniy huqıqların kepillewshi, jámiyette nızamlılıq hám ádillikti ornatıwshı normativlik tiykar sıpatında xızmet etpekte. Onda hár bir puqaranıń abırayı, qádir-qımbatı hám mápleri joqarı qádiriyat sıpatında belgilengen. Bul tariyxıy sáne múnásibeti menen, elimizde nızam ústinligin támiyinlew, puqaralıq jámiyetin rawajlandırıw hám insan huqıqların qorǵaw jolında miynet etip atırǵan barlıq taraw wákillerine minnetdarshılıq bildiremen.
Hár birimiz ushın Watanımızdıń táǵdiri, onıń keleshegi áziz hám muqaddes. Konstituciya ruwxın tereń ańlap, onda belgilengen huqıq hám minnetlemelerge sadıq qalǵan halda, elimizdiń rawajlanıwı, xalqımızdıń abadanlıǵı jolında shın kewilden miynet etiwimiz biykarǵa emes.
Usı ullı bayram kúninde sizlerge hám shańaraqlarıńızǵa tınıshlıq-paraxatshılıq, densawlıq, baxıt-ıǵbal hám hár tárepleme bereketli ómir tileymen. Konstituciyamız ruwxındaǵı ádillik, teńlik hám awızbirshilik principleri turmısımızda óz kórinisin taba bersin!
Húrmet penen, filial direktorı, professor
Esimbetov Adilbay Tlepovich
скачать dle 12.1
Telefon
E-mail
