SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Akademik hám jaslar ushırasıwı: Ilim jolındaǵı mártlik hám pidáyılıq

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında akademik hám jaslar ushırasıwı bolıp ótti. Ilajdı filial direktorı, professor A.Esimbetov ashıp berip, ilim-pánniń rawajlanıwında jaslardıń ornı sheksiz ekenin atap ótti hám sózdi Berdaq atındaǵı Qaraqalpaq mámleketlik universiteti rektorı, akademik, texnika ilimleri doktorı, professor Reymov Axmed Mambetkarimovichke berdi.
Akademik A.Reymov student-jaslarǵa múrájat etip, ilimiy izleniw jolında ushırasatuǵın qıyınshılıqlar hám olardı jeńip ótiw jolları haqqında hár tárepleme sóz etti. — Ilim jolı - sabır, isenim hám tınımsız izleniwdi talap etedi. Haqıyqıy tabısqa erisiw ushın insan óz aldına anıq maqset qoyıwı hám oǵan sadıq qalıwı kerek. Hesh bir jetiskenlik tosınnan kelmeydi, al mashaqatlı miynettiń nátiyjesi bolıp esaplanadı— deydi akademik A.Reymov.
Sonday-aq, ol ilimiy ataqqa erisiw processi hám zamanagóy texnologiyalardıń ilimdegi ornı haqqında da toqtap ótti. "Búgingi kúnde ilimpazdıń quralı - bilim, texnologiya hám innovaciya. Hár bir student keleshekte tek ǵana ózine emes, al jámiyetke payda keltire alatuǵın ilimiy qollanbalar menen shuǵıllanıwı kerek," - dedi A.Reymov.
Ilaj dawamında studentler ózlerin qızıqtırǵan sorawlar menen akademikke múrájat etti. Olar ilimiy maqalalar jazıw sırlarınan baslap, xalıqaralıq konferenciyalarǵa tayarlıq kóriw hám grant joybarlarında qatnasıwdıń áhmiyetli tárepleri haqqında bahalı másláhátler aldı.

Bul ushırasıw tek ǵana ilimiy pikirlesiw maydanına emes, al jaslar ushın ilham dáregine aylandı. Ilaj sońında filial basshıları akademik A.Reymovqa bahalı tájiriybe hám kórsetpeleri ushın shın júrekten minnetdarshılıq bildirip, keleshekte birge islesiw baylanısların bunnan bılay da bekkemlew boyınsha kelisip aldı. Bul ushırasıw jaslardıń ilimge bolǵan qızıǵıwshılıǵın jáne de arttırıp, olardı jańa sheklerge ilhamlandırdı.