SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Jas sharwa" dógeregi arqalı studentlerdiń bilimleri bekkemlenbekte

"Zooinjeneriya" kafedrasında "Jas sharwa" dógereginiń jumısı turaqlı túrde ótkeriletuǵın sabaqlar menen qızıqlı hám nátiyjeli túrde alıp barıladı. Dógerek tek ǵana jaslardıń sharwashılıq tarawına bolǵan qızıǵıwshılıǵın arttırıw emes, al olardıń ilimiy hám ámeliy bilimlerin jáne de bekkemlewde úlken áhmiyetke iye. Kafedranıń stajyor-oqıtıwshısı Z.Tleubaeva tárepinen "Sút jetistiriwdiń xalıq xojalıǵındaǵı áhmiyeti" temasında ótkerilgen gezektegi sabaq jaslar ushın ilimiy jaqtan paydalı boldı.

Sabaq dawamında Z.Tleubayeva súttiń ekonomikalıq hám sociallıq áhmiyetin, onıń xalıq xojalıǵındaǵı ornı hám rawajlanıw perspektivaların sáwlelendirdi. Usı tema sheńberinde studentler sút jetistiriwdiń xalıq xojalıǵı ushın qanday áhmiyetke iye ekenligin, sút ónimlerin islep shıǵarıw hám támiyinlewdi áhmiyetli ekonomikalıq tarmaqlardan biri sıpatında kórsetip ótti. Sabaqta oqıwshılarǵa sútti islep shıǵarıw hám qayta islewdegi zamanagóy texnologiyalar hám ilimiy jantasıwlar haqqında maǵlıwmatlar berildi.

Sonday-aq, sabaq dawamında sút kórgizbesi shólkemlestirildi, bul bolsa studentler hám jaslardıń sút jetistiriw tarawına bolǵan qızıǵıwshılıǵın jáne de arttırdı. Kórgizbede hár qıylı sút ónimleri kórsetilip, student-jaslar ózleriniń prezentaciyaların kórsetip berdi. Prezentaciyalar dawamında jaslar sút jetistiriw tarawında ámelge asırılıp atırǵan innovaciyalar, jańa texnologiyalar hám óndiris nátiyjeliligin arttırıw boyınsha pikirlerin bildirip, usı tarawǵa bolǵan qızıǵıwshılıǵın kórsetti. Bunday ilajlar jaslardı ilimiy jumısqa tartıw, olardıń ámeliy tájiriybesin arttırıw, sonday-aq, sharwashılıq tarawındaǵı jańalıqlar menen tanıstırıwda áhmiyetli orın iyeleydi. Dógerek jumısı arqalı jaslar óz bilimlerin keńeytip, keleshekte bul tarawda tabıslarǵa erisiw ushın zárúr bolǵan tájiriybe hám kónlikpelerdi iyeleydi.