SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Studentler ligası" sport jarıslarında filial jasları belsene qatnaspaqta

Hámmemizge belgili, Prezidentimiz tárepinen ótkerilgen májiliste berilgen tapsırmalardıń orınlanıwın támiyinlew maqsetinde áyne kúnlerde 200 den aslam joqarı bilimlendiriw mákemeleriniń student-jasların qamtıp alǵan halda, 9 sport túri boyınsha "Studentler ligası" sport jarısları ótkerilmekte. Sonıń ishinde, sporttıń badminton, basketbol, voleybol, gandbol, jeńil atletika, gúres, stol tennisi, futzal, shaxmat boyınsha bolıp ótpekte.

Kúni keshe, 21-fevral kúni Qaraqalpaqstan Respublikasındaǵı joqarı oqıw orınları studentleri arasında "Studentler ligası" sport jarıslarınıń badminton sport túrine start berildi. Bul jarısta barlıq joqarı oqıw orınlarınıń studentleri belsene qatnastı. Quwanıshlı tárepi, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń studentlerinen dúzilgen komanda 3-orındı iyeledi.

—Bul, álbette, unamlı nátiyje bolıp, filial studentleriniń sporttaǵı tabısların jáne bir márte kórsetti —deydi "Ekonomika hám gumanitar pánler" kafedrasınıń oqıtıwshısı Q.Urazbaev. Jarısqa qatnasqan barlıq komandalar hám jeńimpazlardı qutlıqlaymız. "Studentler ligası" sıyaqlı jarıslar studentlerdiń tek ǵana fizikalıq salamatlıǵın bekkemlew emes, al olar arasında birge islesiw, doslıq hám básekini rawajlandırıwǵa xızmet etedi.

Bul jarıslar óz-ara baylanıslardı bekkemlew, elimizde salamat turmıs tárizin úgit-násiyatlawda úlken áhmiyetke iye. Sonday-aq, bunday ilájlar jaslardı sociallıq belsendilikke shaqırıw, sportqa qızıǵıwshılıǵın jáne de arttırıwda úlken rol atqaradı.
Komandalardı, ásirese jeńimpazlardı qutlıqlaymız. Olarǵa tek ǵana sportta emes, al turmısta da úlken tabıslarǵa erisiwin tileymiz. Keleshekte bunday jarıslar jaslardıń sportqa bolǵan qızıǵıwshılıǵın arttırıp, elimizdiń sport tarawında jáne jańa tabıslardı alıp keledi.