SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filialdıń birinshi magistrantları dissertaciyaların tabıslı qorǵadı

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında "Sharwashılıq" hám "Haywanlardıń parazitar hám juqpalı kesellikleri" qánigeligi magistrantları magistr akademiyalıq dárejesin alıw ushın dissertaciya jaqlawları ótkerildi. Jámi bes student magistrlik dissertaciyaların tabıslı qorǵadı.
Bul demler filial tariyxında ózine tán áhmiyetke iye bolıp, bul bes student magistratura qánigeligi boyınsha birinshi pitkeriwshiler sıpatında tariyxqa mórlendi. Olardıń dissertaciyaları veterinariya medicinası, sharwashılıq tarawındaǵı áhmiyetli máseleler hám haywanlardıń salamatlıǵın saqlawǵa baylanıslı ilimiy-izertlew jumısları boyınsha ámelge asırıldı. Atap aytqanda, "Qaraqalpaqstan sharayatında piroplazmidozlardıń tarqalıwı hám aldın alıw ilájları", "Qaraqalpaqstan Respublikası aymaǵında tarqalǵan iytlerdiń tiykarǵı gelmintozları hám qarsı gúresiw ilájları", "Selekciya usıllarınıń násilshilikte qarakól qoylarınıń ónimdarlıǵına tásiri" sıyaqlı temalarda prezentaciyalar kórsetildi.
Magistrlik dissertaciyaların qorǵaw procesinde studentler óz ilimiy jumıslarınıń nátiyjelerin keń jámiyetshilikke usındı. Olar ózleriniń ilimiy jetiskenliklerin hám izertlew nátiyjelerin anıq hám durıs tárizde usınıs etip, tarawdıń eń áhmiyetli mashqalalarına sheshimlerin bildirdi. Qorǵaw processi studentler hám ilimiy basshılar arasında ótkerilgen qızǵın dodalawlar menen ajıralıp turdı. Bul tabıslı qorǵaw processi, filial ushın úlken áhmiyetke iye bolıp, onıń ilimiy potencialın jáne de kúsheytiwge xızmet etedi.

Magistratura qánigeligi boyınsha pitkeriwshi studentlerdiń ilimiy izertlewleri Ózbekstannıń veterinariya sistemasında óz ornın tabıwı kútilmekte. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı óziniń dáslepki magistrantların tárbiyalap, olardı kásipke tayarlawda unamlı nátiyjege eristi, desek qáte bolmaydı. Bul tek ǵana studentlerdiń ilimiy ósiwin emes, al filialdıń ilimiy potencialı tartımlılıǵın jáne de arttırıp, bekkemlewge de xızmet etedi.
Keleshekte bul studentler óz ilimiy jumısların dawam ettirip, mámleketimizdiń veterinariya, sharwashılıq hám biotexnologiya tarawlarında jetekshi qánigeler sıpatında ózleriniń úlken úleslerin qosıwı kútilmekte. Sonday-aq, bul tabıs filial ushın jáne bir qádem alǵa ilgerilew bolıp, jańa áwlad ilimine qosqan úleslerin jáne de keńeytiw ushın bekkem tiykar boladı. Bul jetiskenlik, sonday-aq, filialdıń ilimiy-izertlew jumısları hám bilimlendiriwdiń sapasın jáne de jaqsılawǵa bolǵan umtılıslarınıń bir bólegi sıpatında bahalanıwı kerek. Sonday-aq, keleshekte óziniń magistratura baǵdarlamaların jáne de rawajlandırıp, ilimiy tarawlarda joqarı nátiyjelerge erisiwdi dawam ettiredi.