SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filial studentleri Germaniyadan unamlı tásirler menen qayttı

2024-jıl iyun ayında Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń student-jaslarınan dúzilgen «Keleshek jasları» komandası Evropaǵa sayaxat saparı jollamasın qolǵa kirgizgeni haqqında rásmiy veb-saytımız hám barlıq ǴXQ arqalı xabar bergen edik. 2025 jıl yanvar ayında filialımızdıń studentleri Germaniya mámleketiniń Berlin qalasında 10 kún dawamında sayaxat etip, turaqlı awıl xojalıǵı boyınsha Evropa tájiriybesi menen tanısıp, bilimlerin arttırıp qaytı. Maǵlıwmat ornında, studentlerdiń Germaniyaǵa oqıw saparı Evropa awqamı tárepinen qarjılandırılǵan, BMSh Rawajlanıw baǵdarlaması (BMShRB) Ózbekstan Respublikası Awıl xojalıǵı ministrligi menen sherikliktegi “Awıl xojalıǵı hám azıq-awqat sektorınıń “jasıl ekonomika”ǵa inklyuziv ótiwin qollap quwatlaw hám ıqlımǵa baǵdarlanǵan awıl xojalıǵı bilimleri hám innovaciyalıq sistemasın rawajlandırıw ((EU-AGRIN) joybarı tárepinen ámelge asırıldı.
Sapardıń dáslepki kúninde olar Berlinde hár jılı yanvar ayında ótkeriliwi úrdiske aylanǵan «Xalıqaralıq jasıl háptelik» (International Green Week) xalıqaralıq kórgizbesinde qatnasıp, 3 kún dawamında túrli mámleketlerdiń azıq-awqat ónimleri menen jaqınnan tanıstı. Atap aytqanda, bıyıl xalıqaralıq ilájda 61 mámleketten, 1,400 den aslam qatnasıwshı qatnasıp, háptelik sheńberinde seminarlar, konferenciyalar hám basqa ilájlar arqalı azıq-awqat hám awıl xojalıǵı haqqındaǵı bahalı maǵlıwmatlar menen ortaqlastı. Studentler háptelikte belsene qatnasıp, usı sıyaqlı kórgizbeler awıl xojalıǵında dúnya mámleketleri sherikligin bekkemlewde eń áhmiyetli qádem ekenligi boyınsha keń túsniklerge iye boldı. Sonıń menen birge studentler kórgizbege qatnasıw arqalı, túrli mámleketlerden kelgen qatnsıwshılar menen jańa imkaniyatlar hám tendenciyalar haqqında maǵlıwmat almasıwǵa eristi. Isbilermenler, qánigeler menen ashıq sáwbetlesip, olardıń is tájiriybeleri hám ideyaları menen tanıstı.

—«Xalıqaralıq jasıl háptelik» (International Green Week) kórgizbesi men ushın shın mánisinde bilim hám tájiriybe almasıw maydanı boldı. Bul iláj maǵan azıq-awqat sanaatı hám awıl xojalıǵı tarawında jańa kóz qaraslardı kórsetip berdi. Men bilim alıp atırǵan qánigelim ushın arttırǵan tájiriybelerim júdá úlken áhmiyetke iye dep oylayman. Men Berlinde bolıp ótken bul ilájdan úlken motivaciya hám ámeliy kónlikpeler menen qayttım—deydi 3-kurs studenti U.Amangeldiev.
«Keleshek jasları» komandasınıń aǵzaları sayaxat dawamında belgilengen grafik tiykarında Leibniz atındaǵı palız ónimleri hám dekorativ ósimlikler ilimiy izertlew institutı, Berlin qalasındaǵı EUROPA EXPERIENCE multimedia orayı, awıl xojalıǵı haywanları biologiyası ilimiy izertlew institutı, Impact Hub orayı, YPARD (jas awıl xojalıǵı izertlewshileri hám rawajlanıw qánigeleri shólkemi ), Berliner Tafel (azıq-awqat qayırqomlıq shólkemi) hámde Berlindegi Evropa parlamentinde boldı. Álbette, Germaniyaǵa shólkemlestirilgen bul oqıw saparı turaqlı awıl xojalıǵı tarawına qızıǵıwshılıǵı bolǵan studentler ushın jaqsı tájiriybe boldı dep oylaymız. Bul sayaxat student-jaslardı ilhámlandırıwda, olardı innovaciyalıq ámeliyatlar, jetekshi tájiriybeler hám zamanagóy awıl xojalıǵı modelleri menen tanıstırıwda úlken áhmiyetke iye boldı. Sonday-aq, «Keleshek jasları» komandasınıń aǵzaları jańa joybarlardı islep shıǵıw ushın jańa ideyalarǵa iye bolıp qayttı. Sayaxatshı studentlerimiz ózleriniń iyelegen bilimlerin filialdaǵı gruppalas doslarına úyretiw hám Germaniyadaǵı sayaxattıń unamlı tásirlerin ortaqlasıw ushın ushırasıw shólkemlestiriwin atap ótti. Bilim alıwǵa qumar, intalı jaslarımızdıń erisip atırǵan usınday unamlı nátiyjeleri óz ornında bizdi de sheksiz quwanıshqa bóleydi. —Bul sayaxat men ushın ómirimdegi eń ájayip tásirlerge bay hám motivaciya baǵıshlaytuǵın tájiriybelerden biri boldı—deydi sayaxatshı studentlerimizden biri S.Muqimov—Germaniyadaǵı awıl xojalıǵı tarawı, onıń jańalıqlarǵa bayıtılǵan jetekshi texnologiyaları bizlerde úlken tásirlerdi qaldırdı. Bul jerde ilimiy izertlew institutları hám fermer xojalıqları menen tanısıw arqalı kóplegen ámeliy kónlikpelerge iye boldım. Bul jerdegi insanlardıń miymandoslıǵı hám tártip-qaǵıydalarǵa qatań túrde ámel etiwi sapar dawamında hámmemizde unamlı pikirlerdi payda etti.
Sonıń menen birge, bul sayaxat studentlerge tek teoriyalıq jaqtan ǵana emes, bálkim, ámeliy bilimlerdi de beriwde úlken áhmiyetke iye boldı. Studentler Evropa awıl xojalıǵı salasındaǵı zamanagóy modeller, innovciyalıq texnologiyalar hám jetekshi tájiriybeler menen tanısıw arqalı, awıl xojalıǵındaǵı global tendenciyalar hám innovciyalıq jantasıwlardı úyrendi. Bul sayaxat olarǵa jetekshi baǵdarlamalar hám turaqlı ámeliy sistemalar haqqında maǵlıwmat alıwǵa járdem berip, olardıń kásiplik xızmetlerinde jańa ideyalardı hám zamanagóy jantasıwlardı engiziw múmkinshiligin jarattı. Filial studentleri bul tájiriybelerdi ózlestiriw hám zamanagóy awıl xojalıǵı sistemaların óz elinde qollap kóriwge báǵdarlawǵa inta menen qayttı. Sol arqalı olardıń tálim alǵan tarawlarına jańasha jantasıwlardı engiziw, jańa joybarlardı ámelge asırıwda úlken tásir kórsetiwge ılayıq boldı. Sonıń menen birge sayaxat dawamında Germaniyanıń dıqqatqa ılayıq orınlarına barıp, qálbine ájayip esteliklerdi mórledi.